Դատավոր Արմեն Բեկթաշյանի նախագահությամբ 2015 թվականին Նորք-Մարաշում վնասազերծված «զինված խմբի» գործով այսօր հերթական դատական նիստն էր, որի ընթացքում կողմերը շարունակեցին հետազոտել գործում առկա փաստաթղթերը:
Հատկանշական է, որ մեղադրող-դատախազ Գեւորգ Սարգսյանն ընթերցում էր ոչ թե փաստաթղթերի բովանդակությունը, այլ վերնագրերը եւ անվանումները: Սա հունից հանեց ամբաստանյալների պաշտպաններին, որոնք պնդեցին, որ այդ կերպ փաստաթղթերը չեն կարող համարվել հետազոտված:
Դատավոր Արմեն Բեկթաշյանն էլ համաձայնեց դատախազի այն կարծիքին, որ եթե վերջինս հրապարակում է անվանումը, ուրեմն այդքանն է բավարար գտնում:
Ամբաստանյալ, Պաշտպանության նախկին փոխնախարար Վահան Շիրխանյանի շահերի պաշտպան, փաստաբան Հայկ Ալումյանը կոչ արեց դատավարությունն աբսուրդի չվերածել: «Մենք չենք ձգձգում դատավարությունը, բայց դատավարական գործողությունները պետք է պատշաճ կատարել, անգամ եթե դրանք ժամանակ են խլում»,-նկատեց նա:
Ի վերջո, փաստաթղթերի հետազոտումը շարունակվեց դատախազի կողմից անվանումներն ընթերցելով, իսկ այն դեպքում, երբ պաշտպանները միջնորդում էին բովանդակությունը հրապարակել, այն հրապարակվում էր իրենց իսկ ընթերցմամբ:
Հիշեցնենք, որ ըստ մեղադրանքի՝ Արթուր Վարդանյանը 2015թ. ապրիլից ստեղծել ու ղեկավարել է ՀՀ քաղաքացիներից կազմված հանցավոր համագործակցություն, ապօրինի կերպով ձեռք է բերել, պահել, փոխադրել եւ կրել մեծ քանակությամբ զենք, ռազմամթերք, պայթուցիկ նյութեր, պայթուցիկ սարքեր` նպատակ ունենալով Հայաստանի Հանրապետությունում իշխանությունը յուրացնել:
Լուիզա ՍՈՒՔԻԱՍՅԱՆ
