«Սեֆիլյանի քայլերը մեզ կամ մահվան էին տանելու, կամ՝ դատարան բերելու». Հովհաննես Պետրոսյան (Տեսանյութ)

«Սեֆիլյանի եւ մյուսներ գործով» դատական նիստում այսօր ամբաստանյալ Հովհաննես Պետրոսյանը, որը Սեֆիլյանի դեմ ցուցմունք տված անձն է, պատասխանեց մյուս ամբաստանյալների պաշտպանների հարցերին:

Նա դատարանին հայտնեց, որ նախաքննության ընթացքում քննչական մարմինների կողմից իր հանդեպ ֆիզիկական եւ հոգեբանական ճնշումներ չեն եղել: «Ուզում էի հասկանալ՝ ո՞ւր են տանում Սեֆիլյանի քայլերը: Ես պարզապես իրերով եմ խոսելու: Այն ժամանակ էլ ինձ համար տեսանելի էր, որ Սեֆիլյանի քայլերը մեզ կամ մահվան էին տանելու, կամ՝ դատարան բերելու: Ես ապացույցների ճնշման տակ եմ ընդունել մեղքս»,-պնդեց Հովհաննես Պետրոսյանը:

Ապա ասաց, որ ինքը խղճի թելադրանքով է առաջնորդվում եւ դա է իր պաշտպանական մարտավարությունը դատարանում՝ ի տարբերություն Սեֆիլյանի, որը այլ՝ «հեռու տեղերում» եւս պաշտպանություն կարող է ունենալ:

«Եթե իմ՝ դատարանում հայտնվելու նպատակը ՀՀ ազգային շահերին ծառայելն է, ապա ես հպարտ եմ դրա համար: Հասկանո՞ւմ եք, որ եթե հեռուստաաշտարակը շինություն է, ապա զորամասը ոչ միայն շինություն է…ցավոտ հետեւանքներ կարող են լինել…»,-նկատեց Հովհաննես Պետրոսյանը:

Ապա դիմելով Ժիրայր Սեֆիլյանի շահերի պաշտպան, փաստաբան Տիգրան Հայրապետյանին՝ նա ասաց. «Դուք այստեղ գործակալներ եք փնտրում: Եթե ես գործակալ լինեի, իմ եւ Սեֆիլյանի խոսակցությունների ձայնագրությունները կլինեին: Հասկանում եմ, որ դու մասնագետ եք, բայց ձեր աշխատանքն այստեղ կայանում է նրանում, որ շեղեք հասարակության ուշադրությունը: Կարծում եմ՝ ստացվում է: Եթե գործակալ եք ուզում գտնել, ապա գտեք այնտեղ, որտեղ ամենեւին չեք սպասում գտնել: Աստված չանի՝ ակնարկեմ, եւ գործակալը միանգամից արեւի տակ դուրս կգա»:

Տիգրան Հայրապետյանն այսպես արձագանքեց. «Պրիմիտիվ» գործակալ» հասկացություն էլ գոյություն ունի»:

Լուիզա ՍՈՒՔԻԱՍՅԱՆ