Հայաստանի մայրաքաղաք Երևանը կդառնա ավելի կանաչ և էներգաարդյունավետ վայր՝ շնորհիվ 7 միլիոն եվրոյի ֆինանսավորման, որը տրամադրվում է Եվրոպական ներդրումային բանկի (ԵՆԲ) կողմից՝ ԵՄ-ի աջակցությամբ գործող «Արևելյան Եվրոպայի Էներգաարդյունավետության և շրջակա միջավայրի գործընկերություն» (E5P) ծրագրի շրջանակներում:
Նախատեսվում է, որ բարելավվելու է երևանյան այնպիսի հանրային շենքերի էներգաարդյունավետությունը, ինչպիսիք են՝ մանկապարտեզները՝ այդպիսով նվազեցնելով նաև ածխաթթու գազի արտանետումները: Ծրագիրը կօգնի տեղական շենքերն ավելի մոտարկել Եվրոպական Միության չափանիշներին՝ ներդնելով վերականգնվող էներգիայի լուծումներ և առաջարկելով ավելի լավ հասանելիություն սահմանափակ հնարավորություններով մարդկանց համար:
Այս ծրագիրը նաև ներառում է կոշտ թափոնների կառավարման բարելավում: Գործող աղբավայրը կփոխարինվի նոր՝ սանիտարական բարձր չափանիշներին համապատասխանող աղբավայրով, իսկ աղբի վերամշակումը կիրականացվի ինչպես Երևանում, այնպես էլ հարակից տարածաշրջաններում՝ օգուտ տալով ընդհանուր առմամբ 1.9 միլիոն բնակչի:
Արևելյան Եվրոպայի Էներգաարդյունավետության և շրջակա միջավայրի գործընկերությունը բազմադոնոր հիմնադրամ է, որը նպատակ ունի խրախուսել Արևելյան գործընկերության տարածաշրջանում էներգետիկ արդյունավետության և բնապահպանական նախագծերում քաղաքային ներդրումները: Հիմնադրամը միավորում է ԵՄ-ի ու 21 երկրի խմբի ֆինանսական միջոցներ, որոնք այնուհետև օգտագործվում են միջազգային ֆինանսական կառույցների կողմից ազգային դրամաշնորհների ու վարկերի տրամադրման ուղղությամբ:
Աղբյուրը` EU NEIGHBOURS east
