Ազգագրագետ Հրանուշ Խառատյանը ՅՈՒՆԵՍԿՕ-ի կողմից ոչ նյութական ժառանգության ցանկում «Տոլմա» ճաշատեսակի պատրաստման ու տարածման ավանդույթը ադրբեջանական ճանաչելը համարում է կեղտոտ խաղեր:
«Կեղտոտ խաղեր են, մշակույթի շատ էթնիկական տարրեր չեն կարող ապացուցվել, դրանք տարածաշրջանային են լինում: Այդ կեղտոտ խաղերը մարդկանց առճակատումների է տանում:
Հասկանալի է, որ ՅՈՒՆԵՍԿՕ–ն ոչ նյութական մշակութային ժառանգության ամբողջ գործընթացը քաղաքականացված է տանում: ՅՈՒՆԵՍԿՕ–ի որոշումների վրա այդ ցանկերում ընդգրկվող մշակութային տարրերի պատմական, գիտական և էթնիկ ծագումնաբանության հիմնավորումները քիչ են ազդում: Շատ ավելի մեծ դեր են խաղում երկրների մասնավոր գործոնները, հարաբերությունները և ազդեցության մակարդակները»,- ասաց Հրանուշ Խառատյանը:
Հիշեցնենք, որ հայկական «քոչարի» ավանդական խմբային պարը ներառվել է ՅՈՒՆԵՍԿՕ-ի նյութական մշակութային ժառանգության ցանկում, իսկ «տոլմա» ճաշատեսակը ճանաչվել է ադրբեջանական:
Արփինե ՍԻՄՈՆՅԱՆ
