Կենտրոն եւ Նորք Մարաշ վարչական շրջանների ընդհանուր իրավասության դատարանում այսօր ահաբեկչության մասին սուտ հաղորդում տված Էդգար Վիրաբյանի գործով առաջին դատական նիստն էր: Նրան մեղադրանք է առաջադրվել 2017թ. փետրվարին Մաշտոցի պողոտայում գտնվող տաքսոֆոնից ոստիկանություն զանգահարելու եւ Բաղրամյան պողոտայի շինություններից մեկում ռումբ տեղադրված լինելու մասին կեղծ ահազանգ տալու համար: Այսինքն, Վիրաբյանը նախապատրաստվող ահաբեկչության մասին տվել է սուտ հաղորդում:
Դատախազն ընթերցելով մեղադրական եզրակացությունը՝ տեղեկացրեց, որ ըստ համապատասխան բժշկական եզրակացության՝ Էդգար Վիրաբյանն ունի «Շիզոֆրենիա» հիվանդություն եւ հաշվառված է Ավանի հոգեբուժարանում, ուստի ճանաչվել է անմեղսունակ եւ հանրության համար վտանգավորություն ներկայացնող անձ: Ըստ այդմ, դատարանը նրա հանդեպ պետք է կայացնի հարկադիր բուժման որոշում:
Հարցաքննվեց վկա Արթուր Ղազարյանը, որը դատավոր Մնացական Մարտիրոսյանին հայտնեց՝ դեպքի օրն օպերլիազոր է եղել, երբ ստացել են ռումբի մասին ահազանգ: «Բերման ենթարկվելիս Էդգար Վիրաբյանն ասում էր, որ մի զանգ էլ է կատարել այն մասին, թե ԱԺ շենքում էլ ռումբ կա»,-նշեց ոստիկանը:
Այս առնչությամբ Էդգար Վիրաբյանը հավելեց, որ չի հիշում ինչ է ասել: Չհիշեց նաեւ, որ վերջին տարիներին եւս երկու անգամ ահաբեկչության նախապատրաստման մասին կեղծ ահազանգ է տվել: Այդ մասին դատավորն ակնարկեց՝ հասկանալու համար՝ նա հիշո՞ւմ է նախորդ դեպքերը: Վիրաբյանն էլ պատասխանեց, որ երբեմն որոշ իրադարձություններ չի հիշում:
Դեպքի առնչությամբ էլ պատմեց, որ այդ օրը հուզական ծանր վիճակում է եղել, այցելել է հոր գերեզմանին, ինչից հետո ռումբի մասին ահազանգ տվել ոստիկանությանը: «Հիմա ինձ արդեն լավ եմ զգում, քանի ամիս է՝ բուժվում եմ, շնորհակալ եմ բժիշկներից»,-վստահեցրեց նա:
Հավելենք, որ Էդգար Վիրաբյանը ներկայում էլ հարկադիր բուժման մեջ է՝ ավելի վաղ մեկ այլ արարք կատարելու համար:
Վերադառնալով խորհրդակցական սենյակից՝ դատավոր Մնացական Մարտիրոսյանը հրապարակեց դատարանի որոշումը, այն է՝ Էդգար Վիրաբյանին ազատել քրեական պատասխանատվությունից եւ նրան ուղարկել հարկադիր բուժման՝ համապատասխան հոգեբուժական ծառայություններ մատուցող բժշկական հաստատությունում:
Լուիզա ՍՈՒՔԻԱՍՅԱՆ
