ԱԺ-կառավարություն հարցուպատասխանի ժամանակ ՀՀԿ պատգամավոր Կարինե Պողոսյանը հարցրեց՝ սոցփաթեթների համակարգից դուրս են մնացել միջին մասնագիտական կրթություն իրականացնող պետական հաստատությունների մանկավարժները, ինչո՞ւ է տարբերակում դրվում, չէ՞ որ քոլեջների մանկավարժներն էլ ավագ դպրոցների մանկավարժների նման մանկավարժներ են եւ նույն գործառույթներն են իրականացնում:
Աշխատանքի եւ սոցիալական հարցերի նախարար Արտեմ Ասատրյանը պատասխանեց, որ 2012-ին երբ ներդրվեց սոցփաթեթը, հիմնական նպատակն էր պետական ծառայողների մի շրջանակ ներդնել սոցիալական լրացուցիչ աջակցության փաթեթում եւ մի քանի ուղղություններով ապահովել լրացուցիչ վարձատրության համակարգ: Ըստ հնարավորությունների աստիճանաբար պետք է ընդգրկել նոր շրջանակներ: Նախարարն ասաց, որ անցած տարիներին որոշակի շրջանակ ավելացել է, բայց այս պահին հնարավորություն չկա: Նախարարն ասաց, որ այլ կատեգորիաներ էլ կան, որոնց հարցը այս պահին քննարկում են: Բայց 2018-ի բյուջեի նախագծով այդ առումով գումարներ նախատեսված չեն:
Կարինե Պողոսյանը դժգոհեց, որ միեւնույն է, անհավասար պայմաններ են մանկավարժների համար. «Սոցծառայությունից չեն օգտվում նաեւ երաժշտական դպրոցի մանկավարժները, դասախոսները, որոնք այս սուղ պայմաններում դրա կարիքն ունեն»:
Արտեմ Ասատրյանը պատասխանեց, որ սոցփաթեթի ծրագիրը լրացուցիչ սոցիալական երաշխիքների համակարգ է պետական ծառայողների համար:
Հռիփսիմե ՋԵԲԵՋՅԱՆ
