Գյումրիում այսօր առավոտից անդադար ձյուն է տեղում։ Այս պահին էլ ձյան տեղումներն ուղեկցվում են բքախառն քամիով, վատ տեսանելիության պատճառով անհարմար է դարձել թե՛ մեքենաներով երթևեկելը և՛թե առավել ևս ոտքով քայլելը։
Առավոտից Գյումրու քաղաքապետարանի դիմաց շարված է ձյուն մաքրող տեխնիկան, ականատես եղանք, որ փողոցում աշխատող հավաքարարներն էլ՝ բահերը ուսերին, պտտվում են քաղաքի կենտրոնական հատվածներով։ Կենտրոնից կտրված թաղերում գրեթե աշխատանք չի տարվում։
Շիրակի մարզպետարանի տրանսպորտի բաժնի պետ Խաչատուր Խնձրցյանի տեղեկացմամբ, Շիրակի մարզում այս պահին փակ ճանապարհներ չկան։ Սակայն վտանգավոր է Աշոցքի հատվածը, այնտեղ բուք է սկսվել, տեսանելիությունը վատ է։
«Այդքան շատ ձյուն չի եկել, 15 սանտիմետր է, քամին է ուժեղ։ Աշոցքի հատվածում բուք է սկսվել, տեսանելիությունը վատ է, թեև տեխնիկան աշխատում է, մաքրում են, աղով ու ավազով մշակում են»,-վստահեցրեց մարզպետարանի պաշտոնյան։
Նունե ԱՐԵՎՇԱՏՅԱՆ
