«Ապացուցված է, որ պապիլոմա վիրուսներն առաջացնում են որոշ ուռուցքային հիվանդություններ՝ չարորակ ու բարորակ, ինչպես նաեւ հանդիսանում են արգանդի պարանոցի քաղցկեղի պատճառ»,- այսօր «Հայելի» ակումբում ասաց ՀՀ ԱՆ համաճարակաբանության, վիրուսաբանության եւ բժշկական մակաբուծաբանության ԳՀԻ տնօրեն Գայանե Մելիք-Անդրեասյանը:
Ըստ նրա՝ արգանդի պարանոցի քաղցկեղի դեպքերն, ըստ Հայաստանի տվյալների՝ աճել են, եթե ցուցանիշը 1985 թվականին եղել է 8,5, 2016-ին հասել է 15, 4. «Այդ դեպքերից մոտ 60 տոկոսը եղել է բարձիթողի վիճակում, ինչը բարդացնում է բուժումն ու բուժման արդյունավետությունը»:
Նրա խոսքով, պապիլոմա վիրուսներից հատկապես 16 ու 18 տեսակը մոտ 70% դեպքերում կարող են հանդիսանալ արգանդի պարանոցի քաղցկեղ. «2006 թվականից ստեղծվել է պապիլոմա վիրուսի կանխարգելիչ պատվաստանյութ, այն համարվում է առաջին հակաքաղցկեղային պատվաստանյութը… Այսօր ապացուցված է, որ արգանդի պարանոցի քաղցկեղը առաջանում է պապիլոմա վիրուսից, եկեք կանխենք, որ չառաջանա:
Երեկ հրապարակախոս Ռուզան Ասատրյանը հանդես է եկել մի հայտարարությամբ, թե ինչքան կարելի է ասել՝ այս պատվաստանյութը չի բուժում արգանդի պարանոցի քաղցկեղը, այն անձը, որը չունի կենսաբանական ու բժշկական կրթություն, պետք է իրեն իրավունք չվերապահի խոսել նման հարցերից»:
Արփինե ՍԻՄՈՆՅԱՆ
