«Վանաձոր-Քիմպրոմ»-ի ջերմաէլեկտրակայանի (ՋԷԿ) նախկին աշխատակիցների 2011 թվականի 4 ամսվա աշխատավարձն ու վերջնահաշվարկը դեռեւս վճարված չէ: 153 աշխատակիցներ շուրջ 6 տարի է՝ հույսով սպասում են իրենց աշխատանքի արդյունքին, սակայն մինչ օրս սայլը տեղից չի շարժվել:
«Քանի էս իշխանությունն ու պետությունը գոյություն ունի, հույս էլ չկա, որ կտան մեր գումարները: Նամակ ենք գրում, կամ չեն տեսնում, չեն լսում, կամ էլ մեզ մարդատեղ չեն դնում: Ինչքան ներվերներս կհերիքի, դեռ էդքան էլ շարունակելու ենք, մեր քրտինքի արդյունքը ուզենք»,- ասում է ընկերության նախկին աշխատակից Լենդրուշ Կիրակոսյանը:
Ընկերության աշխատակիցները վերջին հույսը մարզի ղեկավարի հետ են կապում: Այսօր նրանք կրկին հավաքվել էին Լոռու մարզպետարանի դիմաց, հանդիպելու մարզպետ Արթուր Նալբանդյանին:
-Հերթագրել են, ասել են տալու ենք: 77 տարեկան եմ արդեն, եսիմ ողջ կլինեմ, չեմ լինի, եսիմ ե՞րբ կտան էդ փողերը: Թոշակով ենք պատրաստվում Նոր տարվան, հույսներս մենակ դա է: Գոնե տան՝ նորմալ Նոր տարի անենք, – ասում է Վանիչկա Պողոսյանը:
Մարզի ղեկավարը լսելով աշխատակիցների դժգոհությունը՝ հետաքրքրվեց. «Դուք ներքին պայմանավորվածություն ունեք, որ մայր գումարը տան, եւ այլեւս պարտք, պահանջ չունեն: Այդ ներքին պայմանավորվածությունը որեւէ մի տեղ երեւո՞ւմ է»:
Աշխատակիցներն էլ տեղեկացրեցին, որ իրենք ունեն նման պայմանավորվածություն, որը գրված է թղթի վրա. «Մենք նամակի ձեւով գրեցինք, որ անգամ համաձայն ենք, որ հետ կանգնենք մնացած գումարից»,-որից հետո մարզպետը շարունակեց. «Ես տեղյակ եմ, որ նախագահի հանձնարարականով, վարչապետը զբաղվում է այս հարցով: Ամսի 8-ին 3,4 հոգով եկեք ինձ մոտ, կարող է ես ձեզ պատասխան կարողանամ տալ: Իսկ, եթե պատասխան չունենամ, կխնդրեմ մի քանի օր եւս, նորից կպատասխանեմ»:
Հիշեցնենք, որ դատարանի որոշմամբ ընկերությունը 153 աշխատակցի պարտք է շուրջ 130 միլիոն դրամ: Այժմ քիմպրոմցիները համաձայն են, որ իրենց վճարեն միայն մայր գումարը, որը կազմում է 65 միլիոն դրամ:
Տաթեւիկ ՂԱԶԱՐՅԱՆ
