Կրթության զարգացման ծրագրի նախագծի վերաբերյալ, որը միտված է 2030 թվականին իրականացնել, «Հոդված 3» ակումբում այսօր քննարկում էր ծավալվել:
ՀՀ կրթության եւ գիտության զարգացման ծրագրերի եւ մոնիթորինգի վարչության պետ Ռոբերտ Ստեփանյանը նշեց, որ Կրթության զարգացման գլխավոր նպատակը պետք է լինի այնպիսի համակարգի ձեւավորումը, որը արձագանքում է անհատի շահերին եւ որը հնարավորություն է տալիս անհատին՝ ստանալ իր պահանջերին համապատասխան կրթություն, որը համապատասխանում է հասարակության եւ տնտեսության պահանջներին եւ ծառայում է ազգային շահերին:
«Պետք է ամեն ինչ անել, որպեսզի համակարգի արդյունավետությունը կարգավորենք, իսկ մատչելիության տեսանկյունից նշեմ, որ պահելով մատչելիությունը պետք է անցում կատարել լրիվ ներառականություն, այսինքն՝ միայն մատչելի չպետք է լինի մեր նպատակը, այլեւ ներգրավումը բոլոր մեր շահառուների»:
Հայաստանի կառավարության ռազմավարական նախաձեռնության կենտրոն հիմնադրամից Մհեր Սահակյանն Էլ նշեց, որ կարեւորը այս պահին այն է, որ կա ճանապարհային քարտեզ եւ հստակ նշված է, թե որ ծրագիրը երբ է իրականացվելու: Նա, խոսելով դպրոցների կառավարման, տնօրենների որակավորման մասին, նշեց, որ երբ որ մենք ունենանք կատարողականի գնահատման համակարգ, իր համար էական նշանակություն չի ունենա, թե դպրոցի տնօրենը որ կուսակցությանն է պատկանում, որովհետեւ նա պետք է ապահովվի դրական արդյունքներ:
Անուշ ՄԱԹԵՎՈՍՅԱՆ
