ԱԺ փոխնախագահ Էդուարդ Շարմազանովի հայտարարությունը խորհրդարանում
Հարգելի խորհրդարան, վերջին շրջանը հագեցած էր քաղաքական իրադարձություններով: Նախ, նոյեմբերի 24-ին Բրյուսելում ստորագրվեց ՀՀ-ԵՄ շրջանակային համաձայնագիրը, որը, կարծում եմ, նոր էջ է բացում հայ-եվրոպական օրակարգում: Վերահաստատելով բազմիցս հնչեցրած այն միտքը, որ այս հարաբերությունների առանցքը Հայաստանի հետեւողական ժողովրդավարացման հարցերն են՝ հարկ եմ համարում նշել, որ այն կարող է արագացնել ինստիտուցիոնալ բարեփոխումները մեր երկրում: Ավելին, այս համաձայնագրով Հայաստանը կարող է կամուրջի դեր ստանձնել մի կողմից ԵՄ-ի ու ԵԱՏՄ-ի, մյուս կողմից էլ Իրանի եւ ԵՄ-ի միջեւ:
Հարգելի գործընկերներ, անչափ կարեւոր էր օրերս Մինսկում տեղի ունեցած ՀԱՊԿ գագաթնաժողովը: Նախ ամրագրվեց եւս մեկ անգամ, որ Հայաստանը պետք է խորացնի իր մասնակցությունը ՀԱՊԿ-ում եւ գտնում եմ, որ ռազմաքաղաքական առումով ՀԱՊԿ-ն այլընտրանք չունի: Անչափ կարեւոր էր ՀԱՊԿ ընդունած հայտարարության Արցախի խնդրի կարգավորման հատվածը, ուր հստակ աջակցություն էր հայտնվում Մինսկի խմբի համանախագահության ջանքերին եւ կոչ արվում իրականացնել Վիեննայի ու Սանկտ Պետերբուրգի պայմանավորվածությունը: Սա պաշտոնական Երեւանի, մասնավորապես Նախագահ Սարգսյանի դիվանագիտական հաջողությունն է:
Հարգելի բարեկամներ, անվտանգության հարցերը մնում են առանցքային մեզ համար, եւ Արցախում զորավարժությունները ցույց տվեցին, որ դիվանագիտական հաջողություններն ամրապնդվում են մարտունակ բանակով, անկոտրում ոգով:
Այս ամենը գալիս է ապացուցելու, որ Հայաստանում անվտանգության ամրապնդումն ու առաջընթացն այլընտրանք չեն կարող ունենալ:
Շնորհակալություն ուշադրության համար:
ՀՀ ԱԺ հասարակայնության եւ տեղեկատվության միջոցների հետ կապերի վարչություն
