Ավան եւ Նոր Նորք վարչական շրջանների ընդհանուր իրավասության դատարանում այսօր քաղաքացիական ակտիվիստ, «Հիմնադիր խորհրդարան» ընդդիմադիր շարժման գաղափարակից Փայլակ Թևանյանի գործով հերթական դատական նիստն էր:
Նրան մեղադրանք է առաջադրվել այն բանի համար, որ նա իշխանության ներկայացուցիչ հանդիսացող դատական կարգադրիչի հանդեպ բռնություն է գործադրել՝ ապտակել է:
Մասնավորապես, այս տարվա հունիսի 28-ին «Սասնա ծռերի» գործով դատավարության ժամանակ նա դատարանի շենքի դիմաց աջ ձեռքով դիտավորությամբ հարվածել է դատական կարգադրիչ Առաքել Արզումանյանի դեմքին`վերջինիս պատճառելով ֆիզիկական ցավ:
Aravot.am-ի հետ զրույցում Փայլակ Թեւանյանի շահերի ներկայացուցիչ, փաստաբան Ռոբերտ Ռեւազյանը տեղեկացրեց, որ այսօրվա նիստում ցուցմունքներ են տվել պաշտպանական կողմի միջնորդությամբ որպես վկա ներգրավված քաղաքացիները: Հայտնել են նույնը, ինչ նախաքննական ցուցմունքներում են ասել: «Նրանք չեն նշել, թե Փայլակ Թեւանյանն ագրեսիվ է եղել: Մեկն անգամ ասաց, որ Թեւանյանն, ընդհակառակը, փորձել է հանդարտեցնել իրավիճակը»,-հայտնեց Ռեւազյանը:
Թե ինչպիսին է Թեւանյանի դիրքորոշումը մեղադրանքի առնչությամբ, փաստաբանը չմանրամասնեց՝ ելնելով պաշտպանական մարտավարությունից: «Կարող եմ միայն ասել, որ նա մեղքը չի ընդունում»,-ասաց Ռոբերտ Ռեւազյանը:
Հավելենք, որ Թեւանյանին առաջադրված մեղադրանքով նրան մինչեւ հինգ տարվա ազատազրկում է սպառնում:
Լուիզա ՍՈՒՔԻԱՍՅԱՆ
