ԵԱՏՄ-ից դուրս գալու գործընթաց սկսելու մասին «Ելք» խմբակցության նախագիծն ԱԺ մեծ նիստերի օրակարգում քննարկելու հարցն այսօր ԱԺ նիստի մեկնարկին դրվեց քվեարկության եւ մերժվեց՝ 76 դեմ, 6 կողմ ձայներով:
Մինչ քվեարկությունը ՀՀԿ պատգամավոր Սամվել Ֆարմանյանը հայտարարեց, որ ՀՀ-ին հաջողվել է գրեթե ոսկերչական ճշտությամբ արտաքին քաղաքականության ոլորտում առաջ տանել մեր երկրի շահերը: ԵԱՏՄ-ի եւ ԵՄ-ի արհեստական հակադրությունը չի բխում ՀՀ շահերից եւ ըստ նրա, «Ելքի» պատգամավորները դա շատ լավ գիտակցում են:
«Ելքի» պատգամավոր Էդմոն Մարուքյանը հայտարարեց, որ ցավոք, խորհրդարանում կրկին արձանագրվեց այն անհավասարակշռությունը, որ ունենք հայկական քաղաքական կյանքում. «Մենք քաղաքական փոխզսպումների եւ հակակշիռների մեխանիզմ չունենք»:
Նա ասաց, որ հակադրություն, ինչի մասին խոսեց Ֆարմանյանը, «Ելք» դաշինքի ներկայացրած նախագծում չի եղել:
Մարուքյանն առաջարկեց ՀՀԿ-ականներին մարզերով, գյուղերով շրջել ու մարդկանց բացատրել, թե ապրանքները ինչու են թանկանում. «Մարդկանց բացատրեք, որ Հայաստանը զարգանում է, որ ապրանքները չեն թանկանում: Մարդիկ արդեն կարագ են բանկ դնում, որ գրավ վերցնեն, կարագն այնքան է թանկացել, դրա մասին մտածեք»:
Հռիփսիմե ՋԵԲԵՋՅԱՆ
