Կոթի գյուղի բնակիչն իր սոցիալական խնդիրները լուծելու նպատակով չպիտի հասնի Նոյեմբերյան, այլ դրանք կլուծի հենց գյուղում տեղավորված կենտրոնում: Այսօր «Հասանելի համայնքային սոցիալական ծառայություններ» ծրագրի ներկայացման ժամանակ ասաց տարածքային կառավարման եւ զարգացման նախարար Դավիթ Լոքյանը: Նրա խոսքով, համայնքներում սոցիալական աշխատողի հաստիք կներդրվի, որն էլ կմեկտեղի համայնքի բնակչի ունեցած խնդիրները: Դրանք էլ կբարձրաձայնվեն համայնքային ինֆորմացիոն կենտրոնների միջոցով, որոնք մոտ ապագայում միավորվելու են սոցիալական աջակցության գլոբալ կենտրոններին:
Պարոն Լոքյանի խոսքով, այսօր բնակչությունն ունի բազմաթիվ խնդիրներ եւ այդ խնդիրների լուծումը չպետք է միջնորդավորված լինի ու որոշակի հեռավորությունից. «Մենք ցանկանում ենք, որ այն լուծվի հենց նույն համայնքում, համայնքի ուժերով»:
Հայաստանում սոցիալական աշխատողների ասոցիացիայի ներկայացուցիչ Միրա Անտոնյանը մտահոգություն հայտնեց, որ սոցիալական աշխատողները վերապատրաստված չեն. «Համայնքում մարդկանց խնդիրները վաղ հայտնաբերող անձի կարիք ունենք, որը դա կանի ոչ թե ինտուիտիվ, այլ` գրագետ: Նաեւ այդ մարդու ձայնը պետք է լսված լինի իրենից հետո եկող օղակներում»: Տիկին Անտոնյանն առաջարկեց միասնական գործակալություն ստեղծել եւ ծրագիրը մեկ մարզում պիլոտային իրականացնել:
Մանրամասները` տեսանյութում
Դավիթ Լոքյանն, արձագանքելով Միրա Անտոնյանի հնչեցրած մտքին, ասաց, որ նախարարությունը պատրաստ է ֆինանսավորել, որպեսզի սոցիալական աշխատողները վերապատրաստվեն: Նա, դիմելով միջազգային կառույցներին` ԱՄՆ ՄԶԳ-ի, Վորլդ Վիժն Հայաստան եւ Մանկական զարգացման հիմնադրամի ներկայացուցիչներին, որոնք նույնպես ներկա էին միջոցառմանը, հորդորեց աջակցել, որպեսզի գոնե խոշորացված 52 համայնքներում, որոնց պարտադրել են ունենալ սոցիալական ծառայողներ, ձեւական չլինելու համար, նրանց վերապատրաստեն. «Պետք է շուտ անել, եթե մենք թողեցինք, որ 52 սոցիալական ծառայող հենց այնպես այնտեղ նստի, մենք նրանցից այլեւս չենք կարող բան ակնկալել»:
Լուսինե ԲՈՒԴԱՂՅԱՆ
