«Չավուշօղլուի հայտարարությունը, որպես այդպիսին, առաջինը չէ: Թուրքիան վերջին տարիներին փորձել է նախաձեռնություններով հանդես գալ հօգուտ Ադրբեջանի եւ խցկվել Մինսկի խմբի համանախագահողների կազմի մեջ, սակայն այդ ջանքերն անհաջողությամբ են ավարտվել»,-«Հենարան» մամուլի ակումբում այսօր անդրադառնալով Թուրքիայի արտգործնախարար Մեւլութ Չավուշօղլուի՝ օրերս արած հայտարարությանը, թե Թուրքիան ջանքեր է գործադրում Լեռնային Ղարաբաղի հակամարտության լուծման համար, ասաց արեւելագետ, թուրքագետ Ռուբեն Սաֆրաստյանը:
Նա համոզված է, որ բանակցային գործընթացի մաս կազմելու Թուրքիայի փորձերը կտապալվեն. «Պատճառն այն է, որ Թուրքիան ակնհայտորեն պաշտպանում է Ադրբեջանին: Բացի այդ, Մինսկի խմբի համանախագահները ոչ մի ցանկություն չունեն ընդլայնելու իրենց շրջանակը: Համոզված եմ, որ Թուրքիային չի հաջողվի խցկվել Մինսկի խմբի համանախագահների շրջանակի մեջ»:
Ինչ վերաբերում է բանակցային գործընթացին, Սաֆրաստյանը փաստեց՝ Ադրբեջանն այն ոչ միայն վիժեցնում է, այլեւ սահմանին ուժ կիրառելով՝ սադրանքների դիմում. «Այդ կերպ ցույց է տալիս, որ շահագրգռված չէ բանակցային խաղաղ գործընթացում»:
Անդրադառնալով նոյեմբերի վերջին Նախիջեւանում կազմակերպած Ադրբեջանի լայնածավալ զորավարժություններին՝ բանախոսը կարծիք հայտնեց, որ դրանք Հայաստանին ուղղված վտանգ են ներկայացնում. «Կարծում եմ՝ Ադրբեջանը եւ Թուրքիան հնարավորություններ են փնտրում՝ ուժեղացնելու իրենց ռազմական ներկայությունը Նախիջեւանում, ինչը մտահոգիչ է»:
Լուիզա ՍՈՒՔԻԱՍՅԱՆ
