Ինչպե՞ս է ստացվել, որ հայկական պատվիրակությունը չի նկատել մյուսների բացակայությունը. այս հարցն այսօր խորհրդարանում հրավիրված մամուլի ասուլիսում լրագրողներն ուղղեցին Սեւծովյան տնտեսական համագործակցության խորհրդարանական վեհաժողովում հայաստանյան պատվիրակության ղեկավար Գագիկ Մինասյանին:
Հիշեցնենք, անցած շաբաթ Կիեւում կայացած ՍԾՏՀ ԽՎ հոբելյանական`50-րդ նիստի ժամանակ, հայաստանյան պատվիրակությունից գաղտնի բանաձեւ է ընդունվել, որում ներառվել են չկարգավորված հակամարտությունների մասին կետեր:
Գագիկ Մինասյանը պատասխանեց`իրենք անմիջապես իմացել-հասկացել են, թե ի՞նչ է կատարվում: Թե ինչո՞ւ չեն միջամտել`չմանրամասնեց: «Այնտեղ աշխատում ենք ոչ առաջին տարին եւ գիտենք բոլոր միջոցները մեր պետական շահը պաշտպանելու համար»,- ասաց նա:
Aravot.am-ի հարցին`ինչո՞ւ տարիներ շարունակ այդ կառույցում աշխատելով հայկական պատվիրակությունը չունի գոնե մեկ դաշնակից երկիր, որը դեմ կկանգներ նման գաղտնի քննարկումներին եւ հայկական պատվիրակության հետ այդ կառույցին կմղեր իր`տնտեսական գործունեության դաշտ, Գագիկ Մինասյանն ասաց`ունենք դաշնակից`ՌԴ-ն է: Հիշեցնենք, այդ նիստի ՌԴ պատվիրակությունը հրավիրված չէր:
Թե ինչո՞ւ այլ դաշնակիցներ չունենք` տեսանյութում
Հայաստանյան պատվիրակության անդամ Աղվան Վարդանյանն էլ տեղեկացրեց, որ Սեւծովյան տնտեսական համագործակցության անդամ երկրների արտաքին գործերի նախարարների խորհրդի նախագահությունը դեկտեմբերի կեսերից վեց ամսով կստանձնի Հայաստանը. «ՍԾՏՀ խորհրդարանական վեհաժողովում էլ նախագահությունն անցնելու է Հայաստանին: Այս ուղղությամբ մենք իսկապես շատ մեծ աշխատանք ունենք անելու»:
Նելլի ԳՐԻԳՈՐՅԱՆ
