«Հեռացեք Ադրբեջանի տարածքներից: Դուք գրավել եք Ադրբեջանի 20 տոկոսը»,- այս կոչը օրերս հնչել է Ուկրաինայի մայրաքաղաք Կիեւում` Սեւծովյան տնտեսական համագործակցության խորհրդարանական վեհաժողովի 50-րդ հոբելյանական նիստի ժամանակ: Դրանք ուղղված են եղել հայկական պատվիրակությանը: Հեղինակը`ՍԾՏՀ ԽՎ քարտուղար Ասաֆ Հաջիեւն է: «Մենք լսեցինք այն զառանցանքները, որոնք 25 տարի է՝ լսում ենք»,- այսօր խորհրդարանում հրավիրված մամուլի ասուլիսում խորհրդարանական վեհաժողովում տեղի ունեցածից մանրամասներ ներկայացրեց հայկական պատվիրակության անդամ Աղվան Վարդանյանը:
Հիշեցնենք, վեհաժողովն իր հոբելյանական նիստի բանաձեւում, ի հակառակ իր մանդատի, ներառել է նաեւ քաղաքական հարց, մասնավորաբար չկարգավորված հակամարտությունների մասին: Ի նշան բողոքի, հայկական պատվիրակությունը լքել է դահլիճը:
«Երբ մենք լքեցինք դահլիճն ու մեկ ժամ հետո վերադարձանք պատվիրակության հայտարարությունը ամբիոնից կարդալու համար՝ շրջեցինք ամբողջ խաղը եւ նրանք ծանր վիճակի մեջ էին: Այն, որ մենք, պարոն Մինասյանի ելույթից հետո նորից լքեցինք դահլիճը, ու այլեւս պաշտոնական միջոցառումներին չմասնակցեցինք, խառնեց իրենց խաղաքարտերը»:
Ըստ Աղվան Վարդանյանի, ՍԾՏՀ ԽՎ գլխավոր քարտուղարն իր գործողությամբ ու հայտարարություններով վնաս է հասցրել կառույցի վարկանիշին եւ շահերին: Ասում է`սրանք պատահական գնահատականներ չեն, բան կա սրա տակ թաքնված: Նկատի ունի`հայկական պատվիրակության հակաքայլերը:
Մանրամասները`տեսանյութում
Հակաքայլերի մասին, սակայն, հիմա չի խոսի. «Թույլ տվեք չմանրամասնել, թե ի՞նչ ենք անում: Այստեղ իրավական խնդիրներ կան, ծալքեր կան, առաջիկայում կտեսնեք»: ԽՎ-ի կանոնակարգը իմպիչմենտի հնարավորություն չի տալիս, բայց գլխավոր քարտուղարի վարքագծի հետ կապված տարբերակներ կան: Բայց որ իր պահվածքով Հաջիեւը, որը պարտավոր էր ի պաշտոնե անկողմնակալ լինել, վնասել է, ոչ միայն խորհրդարանական վեհաժողովին , այլ իրեն`Աղվան Վարդանյանն ասում է`հաստատ է:
Այդ օրերին հայկական մամուլում մեր պատվիրակության եւ նրա ղեկավարի հասցեին նաեւ քննադատություններ հնչեցին: Աղվան Վարդանյանն ասում է` պատվիրակության ղեկավար Գագիկ Մինասյանի գլխավորությամբ պատվիրակությունը լավ աշխատանք է կատարել. «Ցավում եմ նման գնահատականների ու մեղադրանքների համար՝ պատվիրակության ու պատվիրակության ղեկավարի հասցեին: Կարծում եմ՝ մեր մասով սա ազնիվ չէ»:
Նելլի ԳՐԻԳՈՐՅԱՆ
