Այսօր Աջափնյակ եւ Դավիթաշեն վարչական շրջանների ընդհանուր իրավասության դատարանում էքստրասենս Անի Մաջնունյանի սպանության գործով դատական նիստն էր:
Սպանության մեջ մեղադրվող «Յանուս» արտիստական թատրոնի տնօրեն եւ գլխավոր ռեժիսոր Մուշեղ Մխիթարյանի փաստաբան Մարինե Ֆարմանյանը 2 միջնորդություն ներկայացրեց դատարան:
Միջնորդություններից մեկով Մխիթարյանը դատարանին խնդրում էր գործով առանցքային վկաներից մեկի՝ Աննա Միսակյանի հեռախոսահամարներից մեկի ելքային եւ մուտքային զանգերի վերծանումներն ուսումնասիրել: Հիշեցնենք, որ այդ վկան Մուսալեռում գազի արտահոսքի հետեւանքով մահացել է: Իսկ մինչ այդ նա դատարանում պատմել էր այն մանրամասները, թե ինչպես է սպանվել Անի Մաջնունյանը եւ վստահեցրել էր, որ ինքը տեսել է՝ ինչպես է Անի Մաջնունյանը գետնին ընկած ձայներ հանում ու արնաքամ լինում:
Ըստ միջնորդության, Աննա Միսակյանը թաքցրել է, որ մոր անունով գրանցված հետախոսահամարներից մեկն ինքն է օգտագործել: Նա դատարանում ասել էր այն հեռախոսահամարները, որոնցից ինքն օգտվում է, բայց ստել էր ու թաքցրել դրանցից մեկը: Նա դատարանում նշել է, որ վախեցել է Մուշեղ Մխիթարյանից, մինչդեռ, եթե նրա այդ «թաքուն» հեռախոսահամարի ելքային եւ մուտքային զանգերը վերծանվեն, պարզ կլինի, որ նա ժամերով խոսել է Մուշեղ Մխիթարյանի հետ, եթե վախենում էր, ինչի՞ պիտի այդքան խոսեր:
Մեղադրող դատախազն ասաց, որ միջնորդությունը պետք է մերժել, քանի որ Աննա Միսակյանը չի ժխտել Մուշեղ Մխիթարյանի հետ հաճախակի ունեցած կապի մասին:
Տուժողի ներկայացուցիչ Թամարա Բաղդասարյանն էլ ասաց, որ միջնորդությունը անհիմն է. «Աննա Միսակյանը իր ցուցմունքներում հայտնել է, որ շփումներ ունի Մխիթարյանի հետ եւ այս գործի հետ կապված դա էական ոչ մի բան չի տա, միտում կա ձգձգելու նիստը: Այդ հեռախոսահամարի վերծանումով որեւէ էական հանգամանք չի բացահայտվելու, ուստի այն ենթակա է մերժման»:
Դատարանը միջնորդությունը մերժեց:
Հռիփսիմե ՋԵԲԵՋՅԱՆ
