ԵԱՀԿ/ԺՀՄԻԳ խումբը նոյեմբերի 29-դեկտեմբերի 1-ը Երևան կատարած այցի արդյունքում ներկայացրել է ամփոփիչ զեկույցը ապրիլի 2-ին Հայաստանում անցկացված խորհրդարանական ընտրությունների վերաբերյալ:
Զեկույցում արված եզրակացությունները և հանձնարարականները հիմնված են Հայաստանի Ազգային ժողովի, Կենտրոնական ընտրական հանձնաժողովի, կուսակցությունների, պետական մարմինների, քաղաքացիական հասարակության և միջազգային հանրության ներկայացուցիչների հետ հանդիպումների վրա: ԺՀՄԻԳ խումբն ընդգծել է հետագա համագործակցության պոտենցիալ ոլորտները և առաջարկել կոնկրետ քայլեր, որոնք տարբեր շահագրգիռ կողմեր կարող են ձեռնարկել՝ հանձնարարականները դիտարկելու համար։
ԺՀՄԻԳ խումբն ուշադրություն է հրավիրել հատկապես այն առաջնահերթ հանձնարարականների վրա, որոնք ուղղված են ընտրակաշառքներին և պետական ռեսուրսների չարաշահմանը՝ ընտական գործընթացի նկատմամբ հանրային վստահությունն ամրապնդելու համար:
Զեկույցում խորհուրդ է տրվում, ի թիվս այլ քայլերի, ամբողջական և ժամանակին ընտրական բարեփոխումներ անցկացնել՝ օրենքում եղած բացթողումներն ու անհստակությունները վերանայելու համար, այդ թվում կապված քարոզարշավների, դրանց ֆինանսավորման, բողոքարկման և դրանց ժամկետների հետ: ԺՀՄԻԳ-ը նկատել է, որ անհրաժեշտ է հետագա քայլեր ձեռնարկել սահմանափակ հնարավորությունների տեր մարդկանց համար սահմանափակումները վերացնելու համար, ինչպես նաև ընդլայնել կանանց մասնակցությունն ընտրություններին և բարձրացնել ընտրությունների կառավարման արդյունավետությունը:
ԺՀՄԻԳ զրուցակիցների մեծ մասն ընդգծել է, որ անհրաժեշտ է ուշադրություն դարձնել Հայաստանում ընտրական գործընթացի նկատմամբ հանրային վստահության բացակայության խնդրին և կոչ են արել քաղաքական վերնախավին քաղաքական կամք դրսևորել՝ ընտրողների վրա ճնշումների բոլոր ձևերի դեմ և հրապարակային կերպով դատապարտել ընտրակաշառքների և ձայներ գնելու դեպքերը:
«Հաշվի առնելով կողմերի պատրաստակամությունը՝ մասնակցել ընտրական հանձնարարականների իրականացման կարևոր գործընթացին՝ բարեփոխումների հաջող ընթացքի համար անհրաժեշտ են լայն և ընդգրկուն խորհրդատվություններ»,- այցի ընթացքում ասել է ԺՀՄԻԳ դիտորդական առաքելության ղեկավարի տեղակալ Դոնալդ Բիսսոնը:
«ԺՀՄԻԳ-ը պատրաստ է իր աջակցությունն առաջարկել հանձնարարականներն իրականացնելու ճանապարհին, այդ թվում ընտրական օրենսգրքում փոփոխությունները վերանայելու, խորհուրդների ու լավ փորձի և տեխնիկական հարցերի շուրջ»,- ասել է ԺՀՄԻԳ ընտրությունների բաժնի ղեկավար Ալեքսանդր Շլիկը:
ԵԱՀԿ բոլոր անդամ երկրները պարտավորվել են անհապաղ հետևել ԺՀՄԻԳ ընտրական գնահատականներին և հանձնարարականներին:
Պատրաստեց՝ Վիկտորյա ԱՆԴՐԵԱՍՅԱՆԸ
