«Արմավիր» ՔԿՀ-ի դատապարտյալ Գարիկ Ստեփանյանը պատիժը կրելուց պայմանական վաղաժամկետ ազատելու Արմավիրի մարզի ընդհանուր իրավասության դատարանի որոշումը բողոքարկել էր ՀՀ վերաքննիչ քրեական դատարան: Վերջինս 16.11.2017թ-ի դռնբաց դատական նիստում նույնպես մերժել է դատապարտյալին` ստորադաս դատարանի որոշումը թողնելով ուժի մեջ:
Հետաքրքիր է որ վերաքննիչ դատարանը հարցը քննել է առանց դատապարտյալի մասնակցության, սակայն Գարիկ Ստեփանյանին ու նրա հարազատներին այլ բան է հետաքրքրում: Որոշման երկրորդ էջում գրված է. «ՀՀ վերաքննիչ դատարանի 29.09.2017 թ.որոշմամբ դատապարտյալ Վ. Արշակունու վերաքննիչ բողոքն ընդունվել է Վերաքննիչ դատարանի վարույթ, իսկ վերջինիս վերաբերյալ նյութը դատական նիստում քննություն է նշանակվել 2017թ.հոկտեմբերի 19-ին»: Թե ով է Վ. Արշակունին` խմբագրությանը դիմած Գարիկ Ստեփանյանի հարազատները չգիտեն, բայց սա հիմք է տալիս ենթադրելու, որ գործերը քննվում են իմիջիայլոց:
«Լավ, ասենք, պատճենել՝ «քոփի փեյսթ» են արել, բա նախագահող դատավոր Սեւակ Համբարձումյանը չի՞ կարդում՝ նոր ստորագրում, թե՞ նրա համար մարդկային ճակատագրերը նույն են»,-ասաց Գարիկի ընկերը` Աշոտը: Նրա խոսքով՝ էլ ո՞նց հավատաս դատաիրավական բարեփոխումներին, անկաշառ դատավորների անկախ որոշումներին:
Դեռ չեն որոշել` դիմելու են Վճռաբեկ դատարան թե ոչ, սակայն Աշոտը նշեց, որ ընկերոջը 6 ամիս է մնում ազատվելու:
Գարիկ Ստեփանյանը 2004 թ-ին մեղավոր է ճանաչվել ՀՀ քրօրենսգրքի 175 և 104 հոդվածների հատկանիշներով ու դատապարտվել 14 տարվա ազատազրկման:
Դավիթ ԱՐՄԵՆՅԱՆ
