Կոտայքի մարզի Աբովյան քաղաքի մարզադպրոցում շուրջ 15 տարի է, ինչ զարգանում են սամբո և ձյուդո մարզաձևերը։ Այսօր այս սպորտաձևերով մարզադպրոցում զբաղվում է 100 մարզիկ։ Մհեր Կարապետյանը, Ռոբերտ Գաբրիելյանը, Հարություն Սարգսյանը, Բորիս Շատվերյանը մարզադպրոցի սաներից են, ովքեր բազմիցս մասնակցել են թե Հայաստանի, թե Աշխարհի ու Եվրոպայի առաջնություններին և վաստակել են ավելի քան 20 ոսկե, արծաթե և բրոնզե մեդալներ։
«Շուրջ 11 տարի է ինչ զբաղվում եմ սամբո մարզաձևով: Հանդիսանում եմ Հայաստանի բազմակի չեմպիոն, 2016 թվականի Աշխարհի առաջնության բրոնզե մեդալակիր և 2017 թվականի Եվրոպայի չեմպիոն»,- ասում է մարզադպրոցի սան Բորիս Շատվերյանը:
Ըստ մարզիչ Արշալույս Բալյանի՝ այս մարզաձևերը գնալով զարգանում են Հայաստանում, ամեն տարի մեդալների թիվը աճում է: Մարզիկները նշում են, որ նախկինում մարզադպրոցի պայմանները այնքան էլ բավարար չեն եղել, հիմնականում եղել է ջեռուցման խնդիր, իսկ այսօր համեմատաբար վիճակը բարելավված է և այդպիսի խնդիրներ չկան: Արշալույս Բալյանը նշեց նաև, որ մրցույթներին մասնակցելու համար մարզիկները ֆինանսավորվում են Հայաստանի սամբոյի ֆեդերացիայի և ՀՀ Սպորտի և Երիտասարդության նախարարության կողմից:
Մարզադպրոցի սաներն այժմ պատրաստվում են Հայաստանի մեծահասակների առաջնությանը, որը տեղի կունենա դեկտեմբերին:
Աննա Բզնունի
