Ուկրաինան չի կարողանում կատարել իր պարտականությունները որպես Սևծովյան տնտեսական համագործակցության Խորհրդարանական վեհաժողովի նախագահ: Այս մասին ասվում է Ռուսաստանի ԱԳՆ հայտարարության մեջ, փոխանցում է ՏԱՍՍ-ը։
«Ակնհայտ է դառնում, որ Ուկրաինան չի կարողանում պատշաճ կերպով կատարել իր պարտականությունները որպես ՍԾՏՀ նախագահող. խախտվում են բազմակողմ կազմակերպությունների համընդհանուր նորմերն ու սկզբունքները, չի ապահովվում պատվիրակությունների լիակատար մասնակցությունը և ոտնահարվում են պառլամենտարիզմի հիմնական սկզբունքները»,- ասված է հայտարարության մեջ։
ՌԴ ԱԳՆ-ն հիշեցրել է, որ ռուսական խորհրդարանական պատվիրակությունը Կիևում ՍՏԾՀ ԽՎ Գլխավոր Ասամբլեայի նստաշրջանին մասնակցելու հրավեր չի ստացել, որը խախտում է ՍԾՏՀ ԽՎ աշխատանքի կարգը։ ՍԾՏՀ ԽՎ Գլխավոր Ասամբլեայի նստաշրջանում ուկրաինական նախագահությունը չի հրավիրել հայկական խորհրդարանական պատվիրակությանը մասնակցել համատեղ հռչակագրում սկզբունքային նշանակության հարցերի շուրջ փոփոխությունների քննարկմանը։ Արդյունքում, հայկական պատվիրակությունը ստիպված է եղել լքել նիստերի դահլիճը»,– ասված է հայտարարության մեջ:
Ցավոք, պատվիրակությունների իրավունքների այդ խախտումները տեղի են ունեցել մյուս անդամների լուռ համաձայնությամբ: Այս հարցը Վեհաժողովի շրջանակներում լուրջ քննարկում է պահանջում: Ինչ վերաբերում է Ուկրաինայի ներկայացրած փոփոխություններին, դրանք վերջին պահին են տեղ գտել նախնական համաձայնեցված հայտարարության նախագծում և ունեին մտադրված սադրիչ բնույթ: Կիևը չարաշահել է իր գործառույթները և հասել ՍԾՏՀ ԽՎ Գլխավոր ասամբլեայի ամփոփ հռչակագրում սադրիչ փոփոխությունների»,–ասված է ՌԴ ԱԳՆ հայտարարության մեջ:
Պատրաստեց` Վիկտորյա ԱՆԴՐԵԱՍՅԱՆԸ
