Ժիրայր Սեֆիլյանի եւ մյուսների գործով դատական նիստին այսօր ամբաստանյալ Հովհաննես Պետրոսյանին հարցեր ուղղեց նաեւ գործով ամբաստանյալ Գեւորգ Սաֆարյանը:
«Դուք ասացիք, որ Սեֆիլյանի հետ շփվում էիք, որովհետեւ ունեիք ընդհանրական գաղափարներ, հայրենասիրական գաղափարների հիմքի վրա էիք շփվում, այսինքն, կարելի է ենթադրել, որ ձեզ հայրենասեր եք համարում, հարց է առաջանում՝ արդյոք հայրենասիրության պոռթկո՞ւմ է ձեզ մոտ Շուշիի առանձնակի գումարտակի հրամանատարի նկատմամբ դավաճանական գործողություններ անել կամ գործ սարքել ազգային հերոսի գլխին, որը ոչ մի կապ չունի այս թատրոնի հետ»:
Նախագահող դատավոր Տաթեւիկ Գրիգորյանը հարցը հանեց, ինչից հետո վիճաբանություն եւ լեզվակռիվ սկսվեց երկու ամբաստանյալների միջեւ:
«Վիժվածք, ազգի դավաճան, գործ ես սարքում հայրենիքի հերոսի գլխին»,- Պետրոսյանին դիմեց Գեւորգ Սաֆարյանը:
«Տո սապլյակ, լակոտ, չափդ ճանաչի, արա, քեզ դատարանն է թույլ տալիս հարցեր տաս, դու ով ես արա»,- ի պատասխան ասաց Հովհաննես Պետրոսյանը:
Դատարանը սանկցիա կիրառեց ամբաստանյալների նկատմամբ նախազգուշացման տեսքով:
Արփինե ՍԻՄՈՆՅԱՆ
