Պատասխանելով Հայաստանի ազգային կինոկենտրոնի` կինոնախագծերը ընդունելու կարգի մասին լրագրողների հարցին, Հայաստանի կինեմատոգրաֆիստների միության նախագահ Հարություն Խաչատրյանը նշեց, որ լինելով ընտրող հանձնաժողովի անդամ, Վահան Տերյանի մասին իր հայտը հանել է. «Ես իմ ֆիլմը հանեցի, որ մյուսներն էլ հետեւեն իմ օրինակին: Թող երիտասարդները նկարեն, որպեսզի թարմ ավյուն մտնի, ոչ թե մի 5 միջակ ֆիլմ նկարածները 6-րդն էլ նկարեն»:
Նա նաեւ տեղեկացրեց, որ ինքը լինելով հանձնաժողովի անդամ, շատ բաներից տեղյակ չէ, մինչդեռ միշտ կողմնակից է եղել, որպեսզի նախագծերի պաշտպանությունը լինի հրապարակային: Նրա խոսքով, այժմ գնահատման նոր մեխանիզմ է առաջարկվում` բալային համակարգով, ինչին ինքը դեմ է:
«Մեր պայքարը նրա համար էր, որ փիչինգները, պաշտպանությունները լրագրողների ներկայությամբ լինեն: Բավականին լուրջ խոսակցություններ են գնացել տարբեր նախագծերի շուրջ… Դժբախտաբար, իրենց ծրագրերին չեն ծանոթացնում մեզ, խոսք էին տվել, որ Կինոյի մասին օրենքի ներկայացում կլինի եւ կասեն, թե ինչպես են ֆինանսավորելու նախագծերը, բայց դեռ չեն եկել, չգիտենք: Նոր եկած կինոհանձնակատարն էլ իր ծրագրերի մասին ելույթներ չի ունեցել, լրագրողներդ կարող եք պահանջել, որ իր կարծիքը հայտնի, ձեր միջոցով մենք էլ կիմանանք»:
Ինչ վերաբերում է ընտրող հանձնաժողովի նոր կազմին, Հարություն Խաչատրյանի խոսքերով, դա նախարարության կազմած գեղարվեստական խորհուրդն է, որի մեջ կան մարդիկ, որոնք նախկինում էլ են եղել: «Ես երբեք գեղարվեստական խորհրդի մեջ չեմ եղել, հիմա հրավիրվել եմ, բայց քանի որ ինքս սցենար ունեի, չմասնակցեցի»,-հավելեց նա:
Մանրամասները` տեսանյութում:
Գոհար ՀԱԿՈԲՅԱՆ
