«Այս ոճը ես չգիտեմ ով է գցել առաջինը, այդ ոչ մի բան չնշանակող լոզունգը՝ կամ-կամ, եւ-եւ: Սա որեւէ նշանակություն չունի եւ որեւէ երկիր այդպիսի հարց չի դնում, որտեղ ես աշխատել եմ: Իսկ ՌԴ-ում դնում են՝ եթե ինձ հետ ես, իմ պրոբլեմը քո պրոբլեմն է, չի ասում՝ քո խնդիրը իմ խնդիրն է»,- այսօր լրագրողների հետ զրույցում ասաց ՀՀ ԱԺ արտաքին հարցերի հանձնաժողովի նախկին նախագահ, միջազգային հարցերով փորձագետ Հովհաննես Իգիթյանը՝ անդրադառնալով ՀՀ-ԵՄ համաձայնագրին եւ ռուսական մեդիայի արձագանքներին:
Նա ասաց, որ ՌԴ-ում հնչում էին շատ լուրջ մեղադրանքներ, որ մենք պատժամիջոցներ ենք կիրառում եվրոպական երկրների, ԱՄՆ-ի, Կանադայի, Ավստրալիայի դեմ, դուք էլ պետք է կիրառեք, որովհետեւ դուք մեր դաշնակիցն եք:
Ինչ վերաբերում է կամ-կամ-ին, մեր դիտարկմանը, որ Սերժ Սարգսյանը նշեց, որ 2013-ին մենք պատրաստ ենք եղել ստորագրել ԵՄ-ի հետ ասոցացման համաձայնագիրը, այդ կամ-կամ-ը ԵՄ-ն է դրել ու չի ստորագրել՝ Իգիթյանը արձագանքեց. «Չի եղել այդպիսի բան, նման բան գոյություն չունի: Սերժ Սարգսյանը 3 բան պետք է ասեր՝ կամ պետք է ասեր՝ ես մեղավոր եմ, ես սխալվեցի, որը որեւէ այլ երկրի նախագահ չի ասի, կամ պետք է ասի ՌԴ-ն չթողեց, ճնշեց, որը չի կարող եւ հանգիստ կարող էր ասել, որ ԵՄ-ն է մեղավոր, որովհետեւ ԵՄ-ն մեզ երբեք չի պատժել: 2013-ին՝ 4 տարի բանակցություններից հետո թեքվել ենք իրենցից, ընդ որում, գումարներ են իրենք ծախսել բանակցման փուլերի ժամանակ, իրենք նույնիսկ GSP+-ը չեն փակել, հակառակը՝ ընդլայնել են թե՛ ապրանքների, թե՛ քվոտաների մասը: Իրենք միշտ ըմբռնումով էին մոտենում ՀՀ-ի այդ քայլին՝ հասկանալով, թե ինչ խնդիրներ ունի ՀՀ-ն եւ ինչ կարող է անի ՌԴ-ն»:
Հռիփսիմե ՋԵԲԵՋՅԱՆ
