«Առաջարկում եմ, որ մենք կրթական համակարգին անդրադառնանք ոչ թե նիստից նիստ այլ ամեն օր: Ըստ իս իրավիճակը ուղղակի այդպես է թելադրում»,- ԱԺ նիստում հարցուպատասխանից հետո ամփոփիչ ելույթում ասաց Արցախի Հանրապետության նախագահ Բակո Սահակյանը` հավելելով, որ դպրոցներում շարունակվում է ցածր մնալ համալրվածության աստիճանը:
«Խնդիր ունենք նաև բուհերի հետ կապված: Մենք ժամանակին ոչ միայն բարձրաձայնել ենք բուհերի ոչ լիարժեք գործունեության մասին, այլև պայքար ենք ծավալել դրա դեմ: Այդպիսի անհրաժեշտություններ ունենք նաև այս շրջանում: Եվ ես առաջարկում եմ ձեր ընդգծված մասնակցությունը այդ հարցում»,- շեշտեց նախագահը:
Խոսելով վերաբնակեցման վերաբերյալ` Բակո Սահակյանը նշեց, որ ստեղծվել է այն պատկերացումը, որ վերաբնակեցում պետք է կապել կամ Քաշաթաղի, կամ Շահումյանի շրջանների հետ. «Նման մտածելակերպը չի նպաստում վերաբնակեցումը ավելի համատարած դարձնելուն: Վերաբնակեցումը չպետք է դիտարկենք միայն Շահումյանի և Քաշաթաղի շրջաններում: Մենք ունենք համայնքներ, որտեղ ավելի նպատակահարմար է կատարել վերաբնակեցման գործընթացը»:
Նախագահը հանձնարարեց աշխատանքի սոցիալական հարցերի և վերաբնակեցման նախարար Սամվել Ավանեսյանին, որպեսզի նա կազմի և ներկայացնի ծրագիր, եկող տարում, որ համայնքներում է կատարվելու վերաբնակեցման գործընթացը` ներկայացնելով նաև վայրի ընտրելու հիմնավորումները: Այդ աշխատանքում Բակո Սահակյանը առաջարկեց նաև ԱԺ պատգամավորների մասնակցությունը:
Դավիթ ԱԲԱՂՅԱՆ
