Այսօր տեղի ունեցավ Արցախի Հանրապետության Ազգային ժողովի վեցերորդ գումարման վեցերորդ նստաշրջանի հերթական լիագումար նիստը: Նիստի օրակարգում ընդգրկված էր 7 հարց:
Օրակարգում էր Արցախի Հանրապետության բարձրագույն դատական խորհրդի անդամ նշանակելու հարցը: Սահմանադրության և Ազգային ժողովի կանոնակարգ օրենքի համաձայն` խմբակցությունների առաջարկությամբ, բարձրագույն դատական խորհրդի մեկ անդամին նշանակում է Ազգային ժողովը՝ գաղտնի քվեարկությամբ: «Հայրենիք» խմբակցության կողմից առաջադրվել է արդարադատության խորհրդի իրավաբան անդամ Շուշանիկ Հայրապետյանի թեկնածությունը: Գաղտնի քվեարկությամբ վերջինս միաձայն ընտրվեց բարձրագույն դատական խորհրդի անդամ:
Նիստի օրակարգի հարցերից էր նաև «Վերածնունդ» խմբակցության հարցապնդումն` ուղղված հանրապետության նախագահին: Հարցապնդումը հետևյալն էր. 2008 թվականից սկսած՝ Արցախի կառավարության երաշխավորությամբ որքա՞ն վարկային երաշխիք է տրվել ֆիզիկական և իրավաբանական անձանց: Նախագահի կողմից այն հասցեագրված էր պետնախարար Արայիկ Հարությունյանին, որը պատասխանելով հարցապնդմանը, նախ ասաց, որ ֆիզիկական անձանց կառավարության կողմից երբևէ բյուջետային երաշխիք չի տրվել: «Այսօրվա դրությամբ բյուջետային երաշխիքների պարտավորության չափը կազմում է 86 մլրդ դրամ: Երաշխիքները տրամադրվել են հիմնականում Արցախի ներդրումային հիմնադրամին ու գյուղի և գյուղատնտեսության աջակցության հիմնադրամին, ինչպես նաև մի շարք պետական ու մասնավոր ընկերությունների»:
Դավիթ ԱԲԱՂՅԱՆ
