Հայաստանի ԱԺ արտաքին հարաբերությունների հանձնաժողովի նախագահ Արմեն Աշոտյանը Facebook-ի իր էջում մեկնաբանել է Հայաստան-ԵՄ Համապարփակ և ընդլայնված գործընկերության համաձայնագրի ստորագրումից հետո ռուսական հեռուստաալիքներով սկսված հակահայկական քարոզչությունը: Աշոտյանը մասնավորապես գրել է.
1.Հայ-ռուսական ռազմաքաղաքական և տնտեսական տանդեմը վաղուց և հաջողությամբ հանձնել է ամրության փորձությունը:
2.Ռուսաստանի բարձրագույն պետական և քաղաքական իշխանությունների ներկայացուցիչներն իրենց համարժեք և դրական գնահատականն են տվել Հայաստանի արտաքին քաղաքական իրադարձություններին և հենց այդ դիրքորոշումն էլ միակ լեգիտիմն է և պաշտոնականը:
3.Ինչպես և բազմաթիվ այլ հասարակություններում, ռուսական հասարակական-քաղաքական կառուցվածքը միատարր չէ և բազմաշերտ է:
4.Ինչպես Ռուսաստանում, այնպես էլ մեզ մոտ կան որոշակի շրջանակներ, որոնք շահագրգռված են կոնսպիրոլոգիական և մեր ժողովուրդների համար ապակառուցողական օրակարգեր առաջ քաշելու հարցում:
5.Որոշ ռուս փորձագետների և հաղորդավարների ինֆանտիլ փորձերը՝ ցածր քաղաքական պատասխանատվությամբ և հիվանդագին երևակայությամբ լարվածություն մտցնել մեր հարաբերություններում, դատապարտված են տապալման:
Պատրաստեց՝ Վիկտորյա ԱՆԴՐԵԱՍՅԱՆԸ
