Կառավարության այսօրվա նիստում վարչապետ Կարեն Կարապետյանն ասաց, որ ուսումնասիրությունների եւ գործարարների հետ քննարկումների արդյունքում առաջացել է Քրեական օրենսգրքով նախատեսված որոշ տնտեսական հանցագործությունների ապաքրեականացման հարցերին ընդհանուր անդրադարձ կատարելու անհրաժեշտությունը:
Վարչապետը հիշեցրեց, որ 2017 թվականի փետրվարին կառավարության կողմից ապաքրեականացվեց 2 միլիոն դրամի չափով հարկը, տուրքը, պարտադիր այլ վճարները չկատարելու վերաբերյալ նախատեսված նորմը՝ այն բարձրացնելով մինչեւ 4 միլիոն դրամի:
Նա, վկայակոչելով միջազգային փորձն, ասաց. «Առկա քրեաիրավական զարգացումները եւս ընթանում են այդ ուղղությամբ՝ հիմք ընդունելով այն, որ նման հանցակազմերի մի մասը չունեն հանրային վտանգավորության բարձր աստիճան, ինչպես նաեւ դրանց մեխանիզմների իրականացման միջոցով արձագանքելու հնարավորությունը»:
Վարչապետը տնտեսական զարգացման եւ ներդրումների, արդարադատության նախարարներին եւ Պետական եկամուտների կոմիտեի նախագահին հանձնարարեց երկամսյա ժամկետում մշակել եւ ներկայացնել քրեական օրենսգրքով նախատեսված տնտեսական գործունեության ոլորտում առկա այն հանցակազմերի ապաքրեականացման վերաբերյալ իրավական ակտերի նախագծեր, որոնք ունեն հանրային վտանգավորության ցածր աստիճան եւ առկա է դրանց վարչական վարույթի քաղաքացիական դատավարության շրջանակներում լուծման արդյունավետ հնարավորությունները:
Լուսինե ԲՈՒԴԱՂՅԱՆ
