ՀՀԿ ԳՄ նիստում այսօր քննարկվել են ներքաղաքական եւ արտաքին քաղաքական հարցեր: Նիստի ավարտից հետո լրագրողներին ասաց ՀՀԿ խոսնակ Էդուարդ Շարմազանովը:
«ԵՄ-ՀՀ համաձայնագիրը բխում է Հայաստանի շահերից, մեկ անգամ չէ, որ ասել ենք, որ ժողովրդավարության զարգացման, կոռուպցիայի դեմ պայքարի, ինստիտուցիոնալ բարեփոխումների շարունակումը մեր քաղաքական օրակարգի առանցքային հարցերից է:
ՀՀ ժողովրդավարության արժեքներն այլընտրանք չեն, իրականացնելու ենք քաղաքականություն, որի առանցքում ՀՀ պետական շահն է»,- ասաց ՀՀԿ խոսնակը:
Ըստ նրա՝ համաձայնագրի ստորագրմամբ կյանքի կոչվեց եւ-եւ-ի քաղաքականությունը. «Սա որեւէ մեկի դեմ չէ, սա հանուն Հայաստանի է, հանուն մեր գործընկերային հարաբերությունների է: Հայաստանի իշխանություններն ապացուցեցին, որ հնարավոր է զարգացնել դաշնակցային հարաբերություններ ՌԴ-ի հետ, խորացնել ՌԴ, ՀԱՊԿ, ԵԱՏՄ պետությունների հետ եւ այդ կառույցներում մեր ներկայությունն ու մասնակցությունը միաժամանակ կարողանալ ունենալ փաստաթուղթ, որը բխում է ՀՀ ժողովրդավարացման եւ ավելի զարգացած պետություն դառնալու հեռանկարից:
Այս փաստաթուղթը ապացուցում է, որ Հայաստանը կարող է լինել կամուրջ մի կողմից եվրասիական միության ու եվրամիության միջեւ, մյուս կողմից Իրանի ու Եվրասիական միության, Իրանի ու Եվրոպական միության միջեւ, ինչքանով կհաջողվի մեզ, կախված է աշխատանքից: Սա դրական քայլ էր»:
Արփինե ՍԻՄՈՆՅԱՆ
