Այսօր ԱԺ Տնտեսական հարցերի հանձնաժողովում այն արտառոց դեպքերից էր, երբ կառավարության բերած օրինագիծը, այն էլ՝ երկրորդ ընթերցմամբ, բացասական եզրակացություն ստացավ: Հանձնաժողովի նախագահ Խոսրով Հարությունյանը բացակայում էր, նիստը վարում էր Հովիկ Աբրահամյանի որդին՝ «Ծառուկյան» խմբակցության պատգամավոր Արգամ Աբրահամյանը:
Իսկ հանձնաժողովում քննարկվեց կառավարության նախագիծը՝ Հարկային ծառայության եւ Մաքսային ծառայության մասին օրենքներում լրացում կատարելու, ըստ որի, հարկայինի պահուստային ֆոնդի խնայողությունները առաջարկվում է կառավարության ֆոնդ տեղափոխել:
«Ելք» խմբակցության պատգամավոր Արամ Սարգսյանն ասաց, որ այս նախագծին դժվար է դեմ քվեարկել, եղած խաղի կանոնների պայմաններում որոշակի քայլ է, ուստի ինքը կողմ կլինի:
Իսկ «Ծառուկյան» խմբակցության պատգամավորները՝ Սերգեյ Բագրատյանը, Միքայել Մելքումյանը ասացին, որ իրենք առհասարակ արտաբյուջեներին դեմ են. «Ինչո՞ւ պիտի սեւ դրամարկղների տրամաբանությունը անընդհատ շարունակվի, փաստ բերեք, որը արդարացնում է արտաբյուջե ունենալը»:
ՊԵԿ փոխնախագահ Վախթանգ Միրումյանն էլ պատասխանեց, որ արտաբյուջե ունենալ-չունենալու հարցը չի քննարկվում, քննարկվում է եղած խնայողությունները տնօրինելու հարցը: Ինչ վերաբերում է արտաբյուջեներին, ամբողջ աշխարհում ընդունված է, որ հարկային ծառայողներին խրախուսելու համար իրենք իրենց հավաքագրած գումարներից մասհանումներ ունենան:
Այնուամենայնիվ, Մելքումյանն ասաց, որ քանի որ իրենք առաջին ընթերցմանը դեմ են եղել, հիմա էլ դեմ կքվեարկեն: Նախագծին կողմ քվեարկեց 5 պատգամավոր, դեմ էր 5-ը, նախագիծը չանցավ:
Հռիփսիմե ՋԵԲԵՋՅԱՆ
