Այսօր ԱԺ արտաքին հարաբերությունների հանձնաժողովում պոեզիայի ժամ էր՝ ձկնիկ բկլիկից մինչեւ ԽՍՀՄ-ի ժամանակվա հայտնի երկտողերը: Իսկ հանձնաժողովում քննարկվում էր «Ելքի» նախաձեռնությունը՝ ԵԱՏՄ-ից դուրս գալու գործընթաց սկսելու մասին:
ՀՀԿ խմբակցության պատգամավոր Արտաշես Գեղամյանը «Ելքին» պատասխանեց Տյուտչեւի խոսքերով՝ «Умом Россию не понять,
Аршином общим не измерить:
У ней особенная стать –
В Россию можно только верить.»
Իսկ ելույթն ավարտեց Ջիվանու խոսքերով՝ «Իմ բանջարը ձեր հանճարին վնաս չի, մտիկ արեք»: Արմեն Աշոտյանը կատակեց. «Կամաց-կամաց ԱԺ գիտության, մշակույթի հարցերով հանձնաժողովի հացը խլում ենք»:
«Ելքի» պատգամավոր Արարատ Միրզոյանն ասաց, որ այս ելույթները եւ փաստարկները, որ հնչում են հակառակ ճամբարից, տարօրինակ են. «Մենք ներկայացրել ենք փաստարկներ: Մենք խոսում ենք ԵԱՏՄ-ից, ասում են՝ ԵՄ-ն բա քըխ ա, եղբայր, մենք ԵՄ-ից չենք ասել: Կարծում էինք լսումներում լուրջ տնտեսական հիմնավորումներ կլսենք, բայց ոչ մի բան չլսեցինք: Դուք ասում եք՝ ԵՄ, ես էլ ասում եմ առաջին հերթին Վրաստան, Իրանի հետ հարաբերություններ: Ակնհայտորեն «եւ-եւ»-ը չի հաջողվել, որովհետեւ Ասոցացման համաձայնագիրը չի կնքվել, այլ փաստաթուղթ է ստորագրվել: Մենք խոսում ենք տնտեսական միության մասին, դուք խոսում եք ՌԴ-ի մասին, պարոն Գեղամյանը ասում է Թրամփը զանգել է Պուտինին ինչ է ասել, Մերկելը ում հետ է խոսել, մենք խոսում ենք ԵԱՏՄ-ի մասին, դուք անընդհատ տանում եք դեպի ՌԴ, պարոն Զուրաբյանն էլ ասում է՝ մենք բոլորս գիտենք Ռուսաստանն ինչ պետություն է, ժողովուրդ, եթե լեզվի տակ ասելիք կա, եկեք ազնիվ լինենք եւ խոսենք բուն խնդրի մասին: Դուք ասում եք, որ ՌԴ-ն բոբո է, ուժային կենտրոն է, որի հետ պետք է լավ լինենք, որովհետեւ, եթե լավ չլինենք՝ վատություններ կանի, հա՞, բա էդ ասեք, էդ խոսենք»:
Ըստ նրա, եթե նույնիսկ Գեղամյանն է ասում, որ սա ժամանակավրեպ է, ուրեմն սա իսկապես ժամանակի հարց է, պարզապես բոլորը վախենում են, որ ՌԴ-ն վատություն կանի:
Հանձնաժողովի նախագահ Արմեն Աշոտյանն էլ շտապեց Գեղամյանի տեղը հստակեցնել՝ նա ՀՀԿ անդամ չէ, պարզապես խմբակցությունում է, հետեւաբար ՀՀԿ-ի տեսակետը չի կարող ներկայացնել:
Իսկ ինքը՝ Գեղամյանը, ի պատասխան Միրզոյանի, ասաց. «Ձեր աքլորի կանչը շատ շուտով կկանչի, բայց դուք երբեք Պետրոս առաքյալ չեք դառնա:
Հռիփսիմե ՋԵԲԵՋՅԱՆ
