«Այսօր էլ հայ ժողովրդի հանդեպ ցեղասպանությունը շարունակվում է»,-Ոստիկանության ՊՊԾ գունդը գրաված եւ ծանր հանցագործությունների մեջ մեղադրվող «Սասնա ծռերի» գործով դատական նիստում այսօր հայտարարեց ամբաստանյալներից Գագիկ Եղիազարյանը:
Նա դիմելով դատավոր Մեսրոպ Մակյանին՝ ասաց. «Այս իշխանությունների վրա դրված էր խորհրդային Հայաստանի ժառանգությունը պահպանելու եւ զարգացնելու պարտավորություն, մինչդեռ այն ժամանակվա 3,5 միլիոն բնակչությունից այսօր մնացել է 1,5 միլիոն թալանված ժողովուրդ»:
Ըստ Գագիկ Եղիազարյանի՝ Հայաստանն այսօր այնքան թշվառ վիճակում է, որ կարող է համեմատվել աֆրիկյան որոշ երկրների հետ: «Ով կփորձի դատապարտել ժողովրդի ապստամբության իրավունքը, նա կարժանանա Թալեաթի ճակատագրին: Այս անգամ ցեղասպանություն թույլ չենք տա: Այս անգամ հայ ժողովուրդը ցեղասպանության կես ճանապարհին կգնդակահարի Թալեաթին…ուշքի՜ եկեք՝ թալեաթներ»,-շարունակեց Գագիկ Եղիազարյանը:
Հիշեցնենք, որ այս գործով ամբաստանյալներն են Պավել Մանուկյանը, Վարուժան Ավետիսյանը, Մխիթար Ավետիսյանը, Արայիկ Խանդոյանը, Գագիկ Եղիազարյանը, Արմեն Բիլյանը, Արեգ Կյուրեղյանը, Սմբատ Բարսեղյանը, Սեդրակ Նազարյանը եւ Էդվարդ Գրիգորյանը:
Լուիզա ՍՈՒՔԻԱՍՅԱՆ
