«Իշխանությունը յուրացրածները եւ նրանց կամակատարները պետք է պատժվեն հայկական «նյուրնբերգյան դատավարությունում»…այն սարերի հետեւում չէ: Ուշքի՜ եկեք, դուք հայրենադավության եք մասնակցում»,-ՀՀ ոստիկանության ՊՊԾ գունդը գրաված եւ ծանր հանցագործությունների մեջ մեղադրվող «Սասնա ծռերի» գործով դատական նիստում այսօր օգտվելով հայտարարություն անելու իրավունքից, դատավոր Մեսրոպ Մակյանին այս խոսքերով դիմեց ամբաստանյալներից Վարուժան Ավետիսյանը:
Ամբաստանյալներից Արայիկ Խանդոյանն էլ («Միայնակ գայլ») նայելով գործով մեղադրող-դատախազներ Պետրոս Պետրոսյանին եւ Արամ Արամյանին՝ նրանց կանացի անուններով դիմեց, ապա ասաց. «Ի տարբերություն ձեզ, մենք ազատամարտիկներ ենք: Մի փորձեք մեզ «ամբաստանյալ» անվանել…մենք պարտավոր ենք մեր հողը պաշտպանել, ինչպես մեր ծնողներն են պատգամել: Մենք չպետք է ծառայենք ազգուրացներին եւ դավաճաններին»:
Դատախազների հանդեպ անհարգալից վերաբերմունքի համար դատավոր Մեսրոպ Մակյանն Արայիկ Խանդոյանին նախազգուշացում տվեց:
Ամբաստանյալ Սմբատ Բարսեղյանն էլ, դիմելով դատավորին, այսպես ասաց. «Դատարանն էլ ստանում է նախազգուշացում՝ ժողովրդի հանդեպ անհարգալից վերաբերմունքի համար»:
Հիշեցնենք, որ այս գործով ամբաստանյալներն են Պավել Մանուկյանը, Վարուժան Ավետիսյանը, Մխիթար Ավետիսյանը, Արայիկ Խանդոյանը, Գագիկ Եղիազարյանը, Արմեն Բիլյանը, Արեգ Կյուրեղյանը, Սմբատ Բարսեղյանը, Սեդրակ Նազարյանը եւ Էդվարդ Գրիգորյանը:
Լուիզա ՍՈՒՔԻԱՍՅԱՆ
