Բնապահպան Սիլվա Ադամյանն այսօր խորհրդարանում ընթացող «ՀՀ բնության հատուկ պահպանվող տարածքների առկա վիճակը, հիմնախնդիրները եւ լուծման ուղղությունները» թեմայով խորհրդարանական լսումների ժամանակ հարց հնչեցրեց`բնության բոլոր պահպանման ենթակա տարածքների կողքին հանքարդյունաբերական խնդիրներ ունենք`Ամուլսարը, նոր ստեղծվող Ջերմուկը եւ այլն: Նա հետաքրքրվեց`ինչպե՞ս են պատասխանատու այրերը պատկերացնում բնության պահպանության եւ հանքերի շահագործման համատեղումը:
ՀՀ բնապահպանության նախարարության աշխատակազմի կենսառեսուրսների կառավարման գործակալության, բնության հատուկ պահպանվող տարածքների կառավարման բաժնի պետ Արամ Աղասյանը պատասխանեց`դա ցավոտ հարց է: Ասաց, որ իրենք մանրամասն ուսումնասիրում են հանքարդյունաբերության համար ներկայացվող ծրագրերը: Օրինակ բերեց` Ամուլսարում, որոշակի հատված, որը ցանկացել են շահագործել, նախարարությունից թույլ չեն տվել, քանի որ այդ տարածքում «Կարմիր գրքում» գրված սողուններ են եղել:
Պատասխանը չբավարարեց Սիլվա Ադամյանին: Նա կարծում է, որ հանքարդյունաբերություն-հատուկ պահպանվող տարածքներ շղթայում շատ խնդիրներ կան, որոնք պետք է մանրակրկիտ ուսումնասիրվեն եւ լուծումներ գտնվեն:
«Մենք չենք կարող հանքարդյունաբերությունը կանգնեցնեք, ուղղակի պետք է ժամանակակից մեթոդներ բերել»,- ասաց նախարարության ներկայացուցիչը:
«Ծառուկյան» խմբակցության ներկայացուցիչ Սերգեյ Բագրատյանն էլ խոսեց այն մասին, որ Վայոց ձորի որոշ բնակավայրերում արջերը մտնում են գյուղեր եւ լուրջ վտանգ են ներկայացնում տեղի բնակչության համար, անգամ երբ մարդիկ կրակում են, կենդանիները չեն հեռանում: Նախարարության ներկայացուցիչը բացատրեց, որ կեր հայթայթելու խնդիր կա, հավանաբար այդ է պատճառը: «Հայաստանի սոցիալ-տնտեսական վիճակը, փաստորեն, արջերի վրա էլ է ազդել»,- եզրակացրեց պատգամավորը:
Նելլի ԳՐԻԳՈՐՅԱՆ
