«Քարդաշյանն ավելի շատ հետեւորդներ ունի, քան Անդրանիկ Մարգարյանը». «Երկիր ծիրանի» (Տեսանյութ)

Երևանի ավագանու 2-րդ նստաշրջանի 3-րդ նիստը այսօր հաստատեց Օֆելյա Համբարձումյանի և Նորայր Հովհաննիսյանի հիշատակը հավերժացնող հուշատախտակի տեղադրման մասին նախագիծը։

Ավագանու բոլոր անդամները կողմ քվեարկեցին նախագծին: Նույնիսկ ՀՀԿ-ի բոլոր նախագծերին դեմ քվեարկած «Երկիր ծիրանին» կողմ քվեարկեց նախագծին:

«Երկիր ծիրանի» խմբակցության անդամ Սոնա Աղեկյանն ասաց, որ Օֆելյա Համբարձումյանի հուշատախտակի տեղադրումն ունի մշակութային նշանակություն, այդ հուշատախտակի առջև գեթ մեկ րոպե կանգնելով, մարդիկ կսթափվեն այսօր հնչող կլկլոցներից: Նա հայտարարեց, որ խմբակցությունը կողմ է հուշատախտակի տեղադրմանը, բայց հուշատախտակի տեղադրումից հետո պետք է ուշադիր լինել, որ տարածքը մաքուր պահվի:

Իսկ նույն խմբակցության անդամ Մարինե Խաչատրյանը իր ելույթում նշեց, թե խմբակցության համար անհասկանալի է ինչու է Երևանում տեղադրվել ՀՀ նախկին վարչապետ Անդրանիկ Մարգարյանի ցուցատախտակը. «Ի՞նչ կապ ունի նա հայ մեծերի հետ, յուրաքանչյուր հայի համար ապտակ է այդ ցուցատախտակը»:

Նա առաջարկեց Երևանում տեղադրել նաև Քիմ Քարդաշյանի ցուցատախտակը, քանի որ «Նա նույնպես շատ մեծ բան է արել հայ ժողովրդի համար: Կարծում եմ՝ Անդրանիկ Մարգարյանի ու Քիմ Քարդաշյանի հետևորդների քանակն անհամեմատելի է»։

Նելլի ԲԱԲԱՅԱՆ