Երիցուկի պատրաստուկներն օժտված են հակաբորբոքային, ախտահանող, մեղմ սպազմոլիտիկ, հանգստացնող, քրտնաբեր, լեղամուղ, գազամուղ, հակաալերգիկ, ախորժակը լավացնող, շնչառությունը խթանող հատկություններով: Պատրաստուկները մեծացնում են նաեւ սրտի կծկումների հաճախականությունը, լայնացնում գլխուղեղի անոթները:
Երիցուկն արդյունավետ է տարաբնույթ ստամոքսային խանգարումների բուժման ժամանակ. ստամոքսի կամ աղիների գալարակծկում, դանդաղ մարսողություն, սուր եւ քրոնիկական ստամոքսաբորբ, ստամոքսի եւ 12-մատնյա աղու խոցային հիվանդություն, կոլիտ, էնտերոկոլիտ, մանկական փորլուծություններ, որոնք ուղեկցվում են խիթանման ցավերով եւ աղիների փքվածությամբ, լեղաքարային հիվանդություն, լեղուղիների շարժողունակության խանգարում:
Աղիների սպազմի, փքվածության, փորլուծության ժամանակ խորհուրդ է տրվում 4 ճաշի գդալ ծաղիկներին ավելացնել 1 բաժակ եռման ջուր, տաքացնել ջրաբաղնիքի վրա 30 րոպե, սառեցնել սենյակային ջերմաստիճանում 10 րոպե, քամել: Ծավալը եռացրած ջրով հասցնել սկզբնականին: Ընդունել 0,5 բաժակից օրը 2-3 անգամ՝ ուտելուց հետո: Եփուկը կարելի է օգտագործել արտաքին՝ ողողումների, թրջոցների եւ հոգնաների ձեւով:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
28.11.2017
