Ո՞ր կառույցն է, ըստ Զոհրաբյանի, ընտանիքում համերաշխություն հաստատելու ու ինչպես. (Տեսանյութ)

Ընտանեկան բռնությունը կանխարգելող օրենքի նախագծի վերջին փոփոխությամբ այն վերանվանվեց «Ընտանիքում բռնության կանխարգելման, ընտանիքում բռնության ենթարկված անձանց պաշտպանության եւ ընտանիքում համերաշխության վերականգնման մասին» օրենք: «Ընդդեմ կանանց նկատմամբ բռնության» կոալիցիան դեմ է թե այս վերնագրին եւ թե օրենքում ներառված որոշ դրույթներին:

Մասնավորապես կոալիցիան հայտարարել է, որ «Համերաշխություն» տերմինը, որը ներառվել է եւ վերնագրում եւ օրենքում, իրավական տերմին չէ, այն սուբյեկտիվ ընկալման տերմին է:

Բացի այս, կոալիցիան նաեւ կարծիք է հայտնել՝ «Նախագծով ներմուծված հաշտարարության ինստիտուտի կիրառման խնդրահարույց լինելու մասին հարցադրումը: Միջազգային փորձից ելնելով կարելի է փաստել, որ հաշտարարության ինստիտուտի կիրառումը արդյունավետ է կողմերի հավասարության պարագայում, ինչը բացակայում է ընտանեկան բռնություն գործադրած եւ ընտանեկան բռնության ենթարկված անձանց միջեւ հարաբերություններում: Ընտանեկան բռնության գործերով հաշտարարության կիրառման խնդրահարույց եւ ոչ արդյունավետ լինելու վերաբերյալ դիրքորոշում է հայտնել նաեւ ՄԱԿ-ի Կանանց նկատմամբ խտրականության բոլոր ձեւերի վերացման մասին կոմիտեն՝ իր 33-րդ ընդհանուր հանձնարարականում»:

Այսօր փաստաբանների պալատի նախագահ Արա Զոհրաբյանը ներկայացրեց պալատի մի խումբ փաստաբանների կողմից մշակած առաջարկությունների փաթեթը:

Համերաշխություն ոչ իրավական տերմինի ներմուծման մասին, եւ թե որ կառույցը պետք է ընտանիքում համերաշխություն հաստատի հարցին Զոհրաբյանն այսօր լրագրողների հետ հանդիպման ժամանակ այսպիսի պատասխան տվեց. «Նախ որեւէ վերնագրով չես կարող դատել նյութի բովանդակությունը: Օրինակ մենք առաջարկել էինք, որ ապաստարանների նպատակներից մեկը լինի ընտանիքի համերաշխությունը վերականգնելը»:

Ապա` Զոհրաբյանը նարինջի պատմությունն օրինակ բերեց. «Այ, եթե երկու երեխա նարինջ են գտնում, ու կռվում են, թե՝ այդ նարինջն ումն է: Կողմնակի անցորդը  կիսում է նարինջը: Բայց հետո մի երեխա նարինջի միջուկը գցում է, կեղեւը՝ պահում, որովհետեւ նրա մայրը կեղեւով լավ խմորեղեն է պատրաստում, մյուս երեխան կեղեւն է գցում, միջուկը պահում: Ստացվեց, որ երեխաների շահը չհասկացան: Այ, եթե երեխաներին հարցնեին՝ դուք այս նարինջն ինչի՞ համար ես ուզում, եթե հասկանանք երկուսի շահը, երկուսն էլ ավելի կօգտվեն»:

Ըստ Զոհրաբյանի, այստեղ նաեւ հոգեբանական աշխատանք է ենթադրվում, եւ այն կառույցը, որ պետք է լինի համերաշխություն քարոզողը, պետք է տիրապետի հատուկ հմտություններին, վերապատրաստի իր անձնակազմին եւ փորձի լուծել այդ խնդիրը:

Մանրամասն՝ տեսանյութում

Նելլի ԲԱԲԱՅԱՆ