«Ժողովրդի ձայն» հասարակական ակումբը «Ընտանեկան բռնության կանխարգելման եւ խտրականության մասին օրենքները Հայաստանի՝ եվրոպական ինտեգրման կոնտեքստում» սոցհարցում է արել` պարզելու հասարակության վերաբերմունքը վերոնշյալ օրենքների ընդունման եւ Հայաստան-ԵՄ համաձայնագրի շուրջ։ Իրենց պնդմամբ՝ հարցումն անցկացվել է Երեւանում եւ բոլոր մարզերում։ Հարցմանը մասնակցել է մոտ 3300 քաղաքացի։
Ակումբի փորձագետ Ծովինար Կոստանյանը նշեց, որ օրենքների եւ համաձայնագրի կնքելու մասին, ամենաշատը տեղյակ են եղել Երեւանում եւ Արմավիրի մարզում, իսկ ամենաքիչը՝ Տավուշում։
Հարցին, թե ինչպե՞ս եք վերաբերում Հայաստանի՝ ԵՄ-ի հետ ստորագրած համաձայնագրին, հարցվածների 59%-ը պատասխանել է՝ բացասական, 34%-ը՝ դրական եւ 7 %-ը չեզոք դիրքորոշում է հայտնել։ Բացասական պատասխան տվողների 62 %-ը կարծում է, որ ԵՄ-ն Հայաստանին պարտադրում է ընդունել օրենքներ, իսկ 58%-ը նշել է, որ համաձայնագրի ընդունմամբ ժողովրդի սոցիալ-տնտեսական խնդիրները չեն լուծվի։
Ընտանեկան բռնության կանխարգելման եւ սեռական փոքրամասնությունների խտրականության մասին օրենքները անհրաժե՞շտ են Հայաստանին, թե՞ ոչ, հարցվողների 57 %-ը պատասխանել է՝ ոչ, 27 %-ը՝այո եւ 16 %-ն է միայն ասել, որ՝ չգիտի։
«Ժողովրդի ձայն» ակումբի փորձագետ Արման Ղուկասյանը նշեց, որ հարցման մասնակիցների 34%-ի կարծիքով, այդ օրենքների ընդունման պարագայում կոտնահարվեն ընտանեկան արժեքները, 49%-ը կարծում է, որ հասարակության մեջ այլասերվածություն կտարածվի, իսկ 42 %-ը գտնում է, որ այն կարող է հանգեցնել հեղաշրջման։
Արփինե ԲԱՂԴԱՍԱՐՅԱՆ
