«Եթե ուզենայինք՝ կարող էինք տասը դիպուկահարի էլ սպանել, բայց չենք արել: Կարող էինք նռնակ նետել…բայց ժամանակ ենք տվել, որպեսզի ժողովուրդն ինքնակազմակերպվի, իշխանությունն էլ խելքը գլուխը հավաքի»,-«Սասնա ծռերի» գործով դատական նիստում այսօր, օգտվելով հայտարարությամբ հանդես գալու իրավունքից, ասաց ամբաստանյալներից Վարդան Գերավետյանը:
Նրա խոսքով՝ ՊՊԾ գնդի գրավման օրերին Ոստիկանությունը կարող էր հարյուրավոր զոհեր ունենալ. «Պատնեշից այն կողմ գտնվող 18 տարեկան ոստիկանների հետ այդ օրերին զրուցել ենք, ասել, որ չենք կրակելու իրենց վրա»:
Մյուս ամբաստանյալ Մարտիրոս Հակոբյանն էլ իր հերթին ասաց, որ նախորդ տարվա ապրիլյան ռազմական գործողությունների ժամանակ ՀՀ իշխանությունների կողմից «զարհուրելի քայլեր են կատարվել», որոնց մասին ինքը չի բարձրաձայնում, որովհետեւ ռազմական գաղտնիքի խնդիր կա:
Հիշեցնենք, որ «Սասնա ծռերը» մեղադրվում են մի շարք ծանր հանցագործությունների, այդ թվում՝ շենք-շինություններ զավթելու, պատանդառություն կատարելու եւ ոստիկանների սպանությունների մեջ:
Այսօրվա նիստում դատավոր Արթուր Օհանյանը նաեւ մերժեց ամբաստանյալներից Վարդան Գերավետյանի խափանման միջոց կալանքը փոխելու միջնորդությունը, իսկ դա ենթադրում է, որ Գերավետյանը կշարունակի մնալ կալանավորված:
Լուիզա ՍՈՒՔԻԱՍՅԱՆ
