Մալթայի կառավարությունը փորձում է կոծկել իր նախարարների դեմ այն մեղադրանքները, որոնց համաձայն, գազային գործարքների ընթացքում նրանք միլիոնավոր եվրոների կաշառքներ են ստացել հարուստ ադրբեջանցիներից: Այս մասին գրում է բրիտանական The Times պարբերականը:
Մալթացի նախկին ոստիկան Ջոնաթան Ֆերիսը պարբերականին պատմել է, որ կառավարությունը փորձում է իրեն թույլ չտալ տեղեկություններ հրապարակել այն մասին, որ Մալթան կապեր ունի Ադրբեջանի իշխող կլանի հետ:
«Ես կպայքարեմ այս տեղեկատվությունը բարձրաձայնելու համար, որն իսկապես վնասակար է մեր պետության, քաղաքական գործիչների և ներգրավված այլ կառավարական պաշտոնյաների համար,- ասել Ֆերիսը:
Ֆերիսը պնդում է, որ իրեն հեռացրել են Մալթայի ֆինանսական հանցագործությունների բաժնից, քանի որ չափազանց շատ էր հետաքրքրվում պետական խարդախությունների գործով: Նա նշել է, որ գաղտնիության մասին օրենքներով իրեն թույլատրված չէ անուններ նշել, բայց դատարանում կարող է ներկայացնել փաստաթղթեր, որոնցում կապացուցվի մալթացի պաշտոնյաների ապօրինի կապը Ադրբեջանի հետ: Ընդ որում, նրա խոսքով՝ ադրբեջանցիների կողմից այդ գումարները փոխանցվել են Մալթայի «Պիլատուս» բանկի և այլ ֆինանսական հաստատությունների միջոցով:
Պիլատուս բանկը հրաժարվել է մեկնաբանություն տալ գործի վերաբերյալ:
Ֆերիսի բացահայտումները կանխելու համար՝ Մալթայի գլխավոր դատախազը փորձում է վարույթն անցկացնել փակ դռների ետևում: «Նրանք նաև փորձում են ընդհանրապես թույլ չտալ, որ որևէ ապացույց ներկայացվի»,- ասել է Ֆերիսը:
Մալթացի պաշտոնյաների և Ադրբեջանի իշխող կլանի միջև ապօրինի գործարքների վերաբերյալ բացահայտումն առաջինն արել էր լրագրող Կարուանա Գալիցիան, որը այս տարվա հոկտեմբերին սպանվեց մեքենայի պայթյունի հետևանքով:
Պատրաստեց՝ Վիկտորյա ԱՆԴՐԵԱՍՅԱՆԸ
