Քաղհասարակությունը դժգոհում է, որ արդարադատության նախարարությունը Հեռուստատեսության եւ ռադիոյի մասին օրենքը մշակել է գաղտագողի պայմաններում եւ 10 տարիների ընթացքում հնչող իրենց առաջարկությունները որեւէ կերպ տեղ չեն գտել նախագծում: Այսօր լրագրողների այս հարցին արդարադատության նախարար Դավիթ Հարությունյանը պատասխանեց. «Այն, որ որոշ առաջարկություններ կարող են տեղ չգտնել, այստեղ զարմանալի ոչինչ չկա, որովհետեւ, այնուամենայնիվ, նախագիծը մշակողը կառավարությունն է: Այն, ինչ վերաբերում է, այսպես ասած, գաղտնի պայմաններում մշակելուն, ցավոք, ես պետք է բարձրաձայնեմ, որ այդ նախագիծը մարտ ամսից գտնվել է հանրային կայքում՝ e-draft-ում: Մենք այդ կայքի բացումն ենք արել, հրապարակել ենք, չգիտես ինչու, հանրության բազում անդամներ կարողացել են օգտվել այդ կայքից եւ իրենց առաջարկությունները ներկայացնել, իսկ շահագրգիռ քաղհասարակության ներկայացուցիչները այդ օրենքի նախագծի վերաբերյալ գեթ մեկ առաջարկություն չեն ներկայացրել հանրային քննարկման ժամանակ: Ես ուղղակի լավ չեմ պատկերացնում՝ եթե կա մեկ պաշտոնական կայք, որի մասին գիտեն գրեթե բոլորը, որը ունի արդեն տասնյակ հազարներ այցելություն քաղաքացիների կողմից, ինչո՞ւ քաղհասարակությունը դրանից տեղյակ չպետք է լիներ եւ իր առաջարկությունները չներկայացներ»:
Դավիթ Հարությունյանն ասաց, որ այս պահին որոշ հարցեր վերանայվելու են եւ եթե հիմա իրենք ունեն առաջարկություններ, պատրաստ են դրանք լսել. «Ես դեմ եմ աշխատանքի նման ոճին, երբ հրապարակային կայքում տեղադրված նախագծի վերաբերյալ կարելի է կարծիք չարտահայտել եւ սեփական ծուլությունը փորձել բարդել այլոց վրա՝ մեղադրելով նրանց գաղտնի պաշտոնական ինտերնետային կայքում նախագիծ տեղադրելու մեջ»:
Հռիփսիմե ՋԵԲԵՋՅԱՆ
