«Ինչքա՞ն ժամանակ է պետք փոփոխությունների համար»,- խորհրդարանում ընթացող «Մասնագիտական կրթության և ուսուցման ոլորտում ընթացող բարեփոխումներն ու օրենսդրական հիմնախնդիրները» թեմայով խորհրդարանական լսումների ժամանակ ՀՀ կրթության եւ գիտության նախարար Լեւոն Մկրտչյանին հարցրեց ԱԺ փոխնախագահ Միքայել Մելքումյանը`նկատելով, որ մեր տնտեսությունում դեռ կառուցվածքային տեղաշարժեր են, քանի դեռ դրանք չբյուրեղանան, հիմա արված քայլերն անիմաստ կարող են լինել:
Միքայել Մելքումյանը կարծում է, որ բոլոր քայլերը պետք է Հայաստանի տնտեսության զարգացման տեսլականի հետ փոխկապակցված լինեն. «Կա՞ տնտեսության զարգացման մոդել: Նաեւ`մեր կրթական հաստատությունները պատրա՞ստ են ժամանակին համահունչ կրթական ծառայություններ մատուցել: Էն գինը, որ վճարվում է, աշխարհում էդ գնով չես կարող բարձրագույն կրթություն ստանալ: Պետական հայեցակարգում հաշվի առնվա՞ծ է, որ Հայաստանում կան ունեւորներ եւ չունեւորներ: Ունեւորներն իրենց երեխաներին թողնում են ամեն ինչ, նաեւ կրթություն եւ առողջապահություն. պետությունը չունեւորների մասին մտածո՞ւմ է, որ մրցունակություն ապահովեն»,- հետաքրքրվեց Միքայել Մելքումյանը:
Նախարարն ասաց, որ մինչեւ 2030 թվականի զարգացման ծրագրում նախատեսված են քայլեր: Դրանք կկոնկրետացվեն 2018-ից` արդեն յուրաքանչյուր մարզի տասնամյա զարգացման պլանի հիման վրա:
Ինչ վերաբերում է որակին, նախարարն ասաց. «Մենք բոլորս էլ դասախոս ենք, եթե չորրորդ անգամ անբավարար ես դնում, դեկանը գալիս ասում է, մի բան արա`ինքը վճարում ա, որակի մասին անիմաստ է խոսել»:
Մանրամասները` տեսանյութում
Նախարարը նկատեց`բարձրագույն կրթությունը մատչելի չէ հասարակության 25-30 տոկոսի համար, բայց տարկետման իրավունքի վերացմամբ արդեն նաեւ կրթական ոլորտում են փոփոխություններ լինելու եւ հնարավորություն կլինի բարձրագույն կրթությունը մատչելի դարձնել բոլորի համար, տարբեր սոցիալական շերտերին արդեն հստակ ուղղորդելով այն ոլորտներ, որտեղ կա անհրաժեշտություն:
Նելլի ԳՐԻԳՈՐՅԱՆ
