Քաղաքագետ, «Համախմբում» կուսակցության անդամ Անդրանիկ Թեւանյանը համոզված է, որ ԼՂՀ պաշտպանության նախարար Սամվել Բաբայանին դատապարտեցին, որովհետեւ վերջինս ԱԺ ընտրություններում իր աջակցությունն էր ցուցաբերել «ՕՐՕ» դաշինքին:
«Նման գործընթաց տեղի է ունեցել 1991թ.-ին՝ Բաքվում, երբ Սամվել Բաբայանին ձերբակալել էին ինքնապաշտպանություն կազմակերպելու համար: Այսինքն, նման դատ Սամվել Բաբայանի դեմ մեկել Բաքվում է եղել»,-դատարանում այսօր «Իգլա»-ի գործով դատավճռի հրապարակումից հետո լրագրողների հետ զրույցում ասաց նա:
Թեւանյանը նկատեց՝ Բաքվի քարոզչամեքենան միլիարդներ է ծախսում՝ Արցախի ազատության համար պայքարածներին որպես «ռազմական բանդա» ներկայացնելու համար. «Պարզ է, որ Բաբայանի գործը հասնելու է Եվրադատարան: Պատկերացնո՞ւմ եք՝ ի՞նչ են մտածելու ադրբեջանցիները…փաստորեն, ստացվում է, որ մենք մեր ձեռքով բանակը ղեկավարած մարդուն ներկայացնում ենք որպես զենքի գործով եւ փողերի լվացմամբ զբաղվող հանցագործի»:
Թեւանյանը կարծիք հայտնեց, որ դատարանը քաղաքական որոշում է կայացրել:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
