ՀՀ ԱԳՆ-ում Արտաքին գործերի նախարար Էդվարդ Նալբանդյանը և Իրանի Իսլամական Հանրապետության արտաքին գործերի նախարար Մոհամմադ Ջավադ Զարիֆը հայտարարեցին, որ հայ-իրանական քաղաքական և տնտեսական հարաբերությունները զարգացում են ապրում:
Պարոն Նալբանդյանը նշեց, թե իր ու իրանցի գործընկերոջ հանդիպումների հաճախակիությունից բոլորն են տեղյակ ու վստահեցրեց. «Ես և պարոն Զարիֆը հանդիպելու առիթը բաց չենք թողնում ոչ միայն Թեհրանում և Երևանում, այլև միջազգային հարթակում»:
Պարոն Նալբանդյանը տեղեկացրեց, որ Իրանի ԱԳ նախարարի հետ բանակցությունների ընթացքում քննարկվել են նաև տնտեսական համագործակցության հետ կապված հարցեր. «ԵԱՏՄ-Իրան համագործակցության հաստատումը կարող է առաջընթաց ապահովել հայ-իրանական տնտեսական հարաբերությունների զարգացման համար»:
Անդրադառնալով ղարաբաղյան հակամարտության կարգավորման հետ կապված բանակցություններին՝ Էդվարդ Նալբանդյանը շեշտեց, որ ՀՀ-ն կարևորում է միջազգային իրավունքի հիման վրա ղարաբաղյան հիմնախնդրի բացառապես խաղաղ կարգավորման վերաբերյալ Իրանի հավասարակշռված, սկզբունքային դիրքորոշումը:
Իրանի ԱԳ նախարարը շեշտեց, թե բավականին լավ հնարավորություններ են ընձեռնված ՀՀ-ին և Իրանին տնտեսական հարաբերությունները զարգացնելու համար: Նա նշեց, որ իր հետ Հայաստան են ժամանել Իրանի տնտեսական ոլորտի ներկայացուցիչներ, գործարարներ:
Իրանի ԱԳ նախարարը հայտնեց. «Հայ-իրանական տնտեսական համագործակցության շրջանակում ՀՀ-ի հետ էներգետիկ և տարանցման ոլորտը առաջնայինն են: Կարևորվում է նաև բնապահպանության, գիտության և տեխնոլոգիաների ոլորտում համագործակցությունը»:
Ասուլիսի ավարտին Իրանի ԱԳ նախարարը շնորհակալություն հայտնեց ՀՀ-ին միջազգային հարթակում Իրանին աջակցության համար:
Տաթև ՀԱՐՈՒԹՅՈՒՆՅԱՆ
