Մալաթիա-Սեբաստիա վարչական շրջանների ընդհանուր իրավասության դատարանում «Ելք» դաշինքի համակրի նկատմամբ բռնություն գործադրելու գործով դատական նիստերին առաջիկայում տուժող Սարգսյանն ու նրա ներկայացուցիչ Նիկոլայ Բաղդասարյանը չեն ներկայանա:
Այվազյանին մեղադրանք է առաջադրվել երկու հոդվածով՝ զենք-զինամթերքի օգտագործման եւ խուլիգանության:
Նիկոլայ Բաղդասարյանը Aravot.am-ին ասաց, որ դատարանը որոշեց սկզբում հարցաքննել այն վկաներին, որոնք Արթուր Այվազյանի գրպանից առգրավված զենք-զինամթերքի մասով են հարցաքննվելու. «Դրա հետ տուժող կողմը ոչ մի առնչություն չունի, ոչ կողմ ենք, ոչ դեմ ենք, ոչ ուզում ենք այդ փաստը հիմնավորել կամ հերքել: Դրա համար այս պահին ձեռնպահ ենք մնում այդ գործողություններից: Մենք կմասնակցենք խուլիգանության դրվագով վկաների հարցաքննությանը»:
Հիշեցնենք, որ Արթուր Այվազյանին՝ Մանախին, մեղադրանք է առաջադրվել, որ նա 31.03.2017թ ժամը 22:40-ի սահմաններում Անդրանիկի փող 53 շենքի բակում անթաքույց արհամարհանք դրսևորելով հասարակության նկատմամբ, «ԵԼՔ» դաշինքի համակիր Հ. Սարգսյանի նկատմամբ բռնություն գործադրելով՝ կոպիտ կերպով խախտել է հասարակական կարգը, որի ընթացքում պահել է ապօրինի ձեռք բերած գործարանային արտադրության 5,6մմ տրամաչափի օղակաձև բոցավառման որսորդական սպորտային ռազմամթերք հանդիսացող 7 փամփուշտներով լիցքավորված ինքնաշեն ակոսափող թմբուկավոր հրազեն հանդիսացող ատրճանակ:
Արփինե ՍԻՄՈՆՅԱՆ
