Մալաթիա-Սեբաստիա վարչական շրջանների ընդհանուր իրավասության դատարանում այսօր շարունակվեց «Ելք» դաշինքի համակրի նկատմամբ բռնություն գործադրելու գործով դատական նիստը:
Հիշեցնենք, որ Արթուր Այվազյանին՝ Մանախին, մեղադրանք է առաջադրվել, որ նա 31.03.2017թ ժամը 22:40-ի սահմաններում Անդրանիկի փող 53 շենքի բակում անթաքույց արհամարհանք դրսևորելով հասարակության նկատմամբ, «ԵԼՔ» դաշինքի համակիր Հ. Սարգսյանի նկատմամբ բռնություն գործադրելով՝ կոպիտ կերպով խախտել է հասարակական կարգը, որի ընթացքում պահել է ապօրինի ձեռք բերած գործարանային արտադրության 5,6մմ տրամաչափի օղակաձև բոցավառման որսորդական սպորտային ռազմամթերք հանդիսացող 7 փամփուշտներով լիցքավորված ինքնաշեն ակոսափող թմբուկավոր հրազեն հանդիսացող ատրճանակ:
Այվազյանին մեղադրանք է առաջադրվել երկու հոդվածով՝ զենք-զինամթերքի օգտագործման եւ խուլիգանության: Այսօր Արթուր Այվազյանի պաշտպան Հայկ Ալումյանը միջնորդեց տարանջատել երկու հոդվածներով հարցաքննվող վկաներին, ինչը դատարանը բավարարեց: Տարանջատվեցին վկաներն ըստ հոդվածների: Սկզբում կհարցաքննվեն ընթերականներին, թե ինչ կարգով են Այվազյանից զենքն առգրավել, թե ինչպես է զենքը հայտնվել նրա գրպանում: Դատական նիստն այսքանով հետաձգվեց, հաջորդ նիստը նշանակվեց դեկտեմբերի տասնչորսին:
Արփինե ՍԻՄՈՆՅԱՆ
