«Ներկայում մանրամասն ուսումնասիրում ենք օրենքի նախագիծը, որպեսզի առաջարկություններ ներկայացնենք: Որոշ առաջարկներ ձեւակերպումների տեսքով արդեն իսկ տեղ են գտել օրենքի նախագծում՝ հենց ՄԻՊ նախաձեռնությամբ»,-այսօր «Կոռուպցիայի կանխարգելումը և մարդու իրավունքների պաշտպանությունը» համաժողովի շրջանակում լրագրողների հետ զրույցում անդրադառնալով «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» աղմկոտ օրինագծին՝ ասաց ՀՀ Մարդու իրավունքների պաշտպան Արման Թաթոյանը:
Նրա խոսքով՝ ընտանեկան բռնության դեպքերը ՀՀ-ում աճի միտում ունեն. «Այս օրինագիծը որեւէ կերպ չի կարող խաթարել ընտանեկան արժեքները, որոնց խթանումը մեր առաջնահերթությունն է: Երջանիկ ապրելու առավել անհրաժեշտ վայր, քան ընտանիքն է, երեխայի համար դժվար է գտնել»:
ՄԻՊ համոզմամբ՝ անիմաստ է խոսել ամուր ընտանիքի մասին, եթե կանխարգելման արդյունավետ միջոցներ չկան. «Ունեցել ենք դեպքեր, երբ, օրինակ, երեխան չի հաճախել դպրոց կամ մանկապարտեզ՝ ընտանեկան բռնության պատճառով: Նաեւ մահվան ելքով դեպքեր են գրանցվել»:
Մեկնաբանելով իրավապաշտպանների մտահոգություններն առ այն, որ օրինագծի անվանումը փոխվել է, ինչը չի բխում խնդրի լուծումից, Արման Թաթոյանը նկատեց. «Վերնագիրը կարեւոր չէ, կարեւոր են օրինագծի դրույթները: Օրինագիծն անհրաժեշտություն է մեր երկրի համար: Բայց պետք է զգույշ վարվել, որպեսզի ընտանիքը խաթարող դեպքերը բացառվեն»:
Լուիզա ՍՈՒՔԻԱՍՅԱՆ
