ԵԱՏՄ-ին ՀՀ անդամակցությունը դադարեցնելու գործընթաց սկսելու վերաբերյալ «Ելք» խմբակցության հրավիրած խորհրդարանական լսումների ժամանակ «Ելք» խմբակցության պատգամավոր Արարատ Միրզոյանը հարցրեց՝ մենք ո՞ւմ հետ ենք համեմատվում, այն երկրների,՞ որտեղ իշխանությունը փոխանցվում է ցմահ կամ «սեռական» ճանապարհով, երկրների՞, որոնք հետընթաց են ապրում, մինչդեռ աշխարհը սրընթաց զարգանում է, եթե մենք այդ երկրների մեջ ենք ուզում լինել, սա խոսում է մեր ոչ ադեկվատ լինելու մասին:
Արարատ Միրզոյանի խոսքով՝ «Մի հատ տռուբա էինք գցել գազի՝ Իրանից, էն էլ էդ տռուբան էլ ստիպեցին, սարքեցին մի հատ նեղ շլանգ, էն էլ կառավարումը հանձնեցինք ՌԴ-ին»:
ՀՀԿ պատգամավոր Սամվել Ֆարմանյանն ասաց, որ ՀՀ- ԵՄ արեւելյան գործընկերներից միակ պետությունն է, որը պահպանելով փայլուն հարաբերություններ ուժային մեկ այլ կենտրոնի՝ ՌԴ-ի հետ, կարողացավ ստորագրել հուշագիր: Մյուս երկրները ավելի խորը եւ համապարփակ պայմանագրեր ստորագրեցին եւ ունեցան այլ ուղղությամբ խնդիրներ:
Նա ասաց, որ «մեր խնդիրն այն է, որ տանը նստած՝ աշխարհի քարտեզը բաժանում ենք չարի եւ բարու թագավորությունների, սկսում ենք հիմնավորել՝ որն է չարը, որը՝ բարին՝ առանց հասկանալու, թե ինչն է բխում մեր շահերից՝ որպես անկախ պետականություն»:
Պատմությունը ցույց է տվել, որ փրկիչներ փնտրելը ճիշտ չէ, ոչ ոք մեզ չի փրկելու, ըստ Ֆարմանյանի՝ եւ չպետք է հակադրություններ դնել՝ ներքին սատանայական մղումներով:
Հռիփսիմե ՋԵԲԵՋՅԱՆ
