ՀՀ արդարադատության նախարար Դավիթ Հարությունյանը համոզված է, որ Հայաստանի եւ ԵՄ-ի միջեւ Համապարփակ եւ ընդլայնված համաձայնագրի ստորագրման արդյունքում այսուհետեւ իրավական ծրագրերը կմշակվեն եվրոպական արժեքներին համապատասխան: «Մենք մշակում ենք դատաիրավական համակարգի բարեփոխումների 5-ամյա ռազմավարություն, որը ենթադրում է որոշակի ցուցանիշներ եւ առաջնահերթություններ»,-«Կոռուպցիայի կանխարգելումը և մարդու իրավունքների պաշտպանությունը» համաժողովի շրջանակում այսօր լրագրողների հետ զրույցում ասաց Դավիթ Հարությունյանը:
Թե մասնավորապես ինչ ծրագրեր է ենթադրում համաձայնագիրը, նախարարը նշեց, որ այս մասին կհայտնեն առաջիկայում: Իսկ թե ինչ է արվում կոռուպցիայի դեմ պայքարի ուղղությամբ, Հարությունյանի խոսքով՝ աշխատում են մի քանի ուղղություններով:
Որպես օրինակ նա նշեց. «Այս տարի պաշտոնյաների համար կանխիկ գործարքների ձեւակերպման սահմանափակում է մտցվել: Խնդիրն այն է, որ նման գործարքներն օգտագործվում էին կոռուպցիոն ճանապարհով ստացված միջոցներն օրինականացնելու նպատակով: Օրենքը շրջանցելու ճանապարհն, այսպիսով, բացառվում է, իսկ արդյունքի մասին՝ ապագայում»:
Լուիզա ՍՈՒՔԻԱՍՅԱՆ
